Amarangamutima ya Kylian Mbappé wamaze kuba "Mbappé" abantu bari biteze muri Real Madrid

Ku Cyumweru Saa kumi n'imwe ni bwo Real Madrid yari yakiriye Las Palmas mu mukino wo ku munsi wa 20 wa shampiyona ya Espagne.

Ni umukino warangiye Las Palmas itsinzwe ibitego 4 bya Kylian Mbappé ku munota wa 18 na 36, Brahim Diaz ku munota wa 33 na Rodrigo ku munota wa 57 mu gihe kimwe cya Las Palmas cyatsinzwe na Silva ku munota wa 1.

Kylian Mbappé witwaye neza muri uyu mukino nyuma yawo yatangaje ko kuri ubu yamaze kwisanga mu ikipe ndetse akaba ari gukina mu buryo ashakamo.

Yagize ati: "Ndanezerewe rwose. Ubu nisanze mu ikipe kandi nshobora gukina uko nshaka, hamwe na bagenzi banjye, hamwe nuko nteye. Turi kubiryoherwa".

Kylian Mbappé yavuze ko uyu wari umukino w'ingenzi kuri bo bijyanye nuko bari bazi ko Atletico Madrid na FC Barcelona zo zatakaje amanota.

Ati: "Wari umukino w'ingenzi, twari tuzi ibyabaye ejo kuri Atletico na Barcelona. Twashakaga gutsinda, kandi twatsinze. Twatangiye nabi ariko uko twasubije byari hejuru.

Twari ku maguru y'imbere, dukina byihuse, dusatirana imbaraga. Twatsinze ibitego byinshi. Turishimye kuko turi abayobozi".

Yavuze ko kandi kuba baratakaje igikombe cya Super Cup byari ibintu bikomeye gusa nyuma yaho bitwaye neza haba muri Copa del Rey ndetse no muri shampiyona none kuri ubu akaba ari bo bireba kugira begukane igikombe.

Yagize ati: "Nishimiye uko ikipe yitwaye. Gutakaza Supercopa byari bikomeye gusa twakinnye neza muri Copa del Rey, twakoze amakosa tujya mu minota y'inyongera ariko twari dufite intego yo gutsinda. Uyu munsi wari ingenzi cyane, ubu noneho ni twe bireba ubwacu kugira ngo dutware shampiyona."

Kylian Mbappé utaragize intangiriro nziza muri iyi kipe amaze gutsinda ibitego 12 ndetse yanatanze imipira ibiri yabivuyemo mu mikino 18 ya shampiyona amaze gukina. 

Ni mu gihe Real Madrid yo kugeza ubu ariyo kipe iyoboye urutonde rwa shampiyona n'amanota 46 aho irusha Atletico Madrid iyikurikiye amanota 2 naho ikarusha FC Barcelona ya 3 amanota 7.

Kylian Mbappé yatangaje ko kuri ubu yamaze kwisanga mu ikipe