Liverpool bikunze kuyibaho! Amakipe yakuwemo ikinyuranyo cy'amanota menshi mu mateka ya Premier League

Ikipe ya Liverpool yasoje ukwezi kwa 11 k'umwaka ushize imaze gushyiramo ikinyuranyo cy'amanota 9 ku ikipe ya Arsenal na Chelsea zari yikurikiye ndetse n'amanota 11 kuri Manchester City yari ku mwanya wa 5 icyo gihe.

Kuva icyo gihe iyi kipe hari imikino yagiye ititwaramo neza irimo n'uheruka yanganyijemo na Nottingham Forest igitego 1-1. 

Kuba Arsenal yaratsinze umukino wayo iheruka gukinamo na Tottenham Hotspur byahise bituma itangira kugabanya ikinyuranyo cy'amanota yari yarashyizwemo na Liverpool aho kuri ubu hasigayeno amanota 4 gusa nubwo iyi kipe itozwa na Arne Slot igifite umukino w'ikirarane na Everton.

Nyuma yuko bigaragaye ko Liverpool ishobora gukurwamo ikinyuranyo cy'amanota yari yarashyizemo ku makipe ayikurikiye, tugiye kureba amakipe yagiye akurwamo ikinyuranyo cy'amanota menshi mu mateka ya Premier League.

6. Liverpool -2018-19

Pep Guardiola na Jurgen Kloopp ni bamwe mu batoza bakunze guhangana cyane muri Premier League mu myaka 8 iheruka mbere y'uko uyu umugabo ukomoka mu Budage atandukana na Liverpool mu mwaka ushize wa 2024.

Mu mwaka w'imikino wa 2018/19 ikipe ya Liverpool yagize intangiriro nziza aho yasoje imikino ibanza ya shampiyona ndetse ikinjira no mu mwaka mushya itaratsindwa. Mu mikino 20 yari imaze gukina yari yaratsinzemo imikino 17 naho inganyamo 3.

Muri iyi mikino kandi Liverpool yari yarinjijwemo ibitego 8 gusa, ndetse iri ku mwanya wa mbere aho yarushaga Manchester City yari iyikurikiye amanota 10 ariko yo ikaba yari inafite umukino umwe w'ikirarane.

Tariki ya 3 z'ukwezi kwa Mbere Liverpool yaje gukina na Manchester City gusa birangira itsinzwe ibitego 2-1. 

Urugendo rwo gutakaza igikombe ni aha rwari rutangiriye dore ko hari imikino yagiye itakaza bituma Manchester City ariyo yegukana igikombe dore ko yo mu mikino 19 yayo yo kwishyura yashoboye gutsindamo 18. Icyo gihe Liverpool yasoje shampiyona ifite amanota 97 naho Manchester City yo irusha inota rimwe.

Ni ubwa mbere mu mateka ya Premier ikipe yari igize aya manota ariko ntishobore gutwara igikombe.

5. Liverpool -2008/09

Ikintu cyo gukurwamo Ikinyuranyo cy'amanota, abafana ba Liverpool bacyumva cyane dore no muri uyu mwaka w'imikino wa 2008/09 byababayeho.

Liverpool yari imeze neza muri ibi bihe bijyanye n'abakinnyi bakomeye yari ifite nka Fernando Torres, Steven Gerrard na Xabi Alonso. Yageze mu kwezi kwa 12 kwa 2008 yarashyizemo ikinyuranyo cy'amanota 10 ku Ikipe yari iyikurikiye ya Manchester United.

Ahanini icyatumye ibi bibaho ni ukubera ko Manchester United yari ifite imikino y'ibirarane 3 itakinnye bitewe nuko yari mu mikino y'igikombe cy'Isi cy'amakipe. 

Mu mikino yo kwishyura, Manchester United yaje gukina bya birarane byayo ndetse initwara neza mu yindi yari isigaye birangira ariyo yegukanye igikombe irusha amanota 4 Liverpool.

4.Arsenal 2002-03

Ikipe ya Arsenal muri uyu mwaka w'imikino yatakaje igikombe kandi benshi barabonaga ko ariyo ishobora kugitwara. Ikipe ya Manchester United yari yatangiye nabi imikino ya shampiyona aho yari yatsinze imikino 2 gusa mu mikino 6.

Ibi nibyo byatumye Arsenal igera mu kwezi kwa 12 iyoboye urutonde rwa shampiyona aho yarushaga amanota 10 Manchester United yari ku mwanya wa kabiri.

Mu mikino yo kwishyura ikipe y'abarashi yatangiye gutakaza amanota dore ko hari n'aho batsinze umukino umwe mu mikino itanu yikurikiranya. Nubwo byari bimeze bityo ariko ikipe y'amashitani atukura yo yarimo iritwara neza dore ko yakinnye imikino 18 itaratsindwa bituma ari nayo ihita yegukana igikombe cya shampiyona irusha Arsenal amanota 5.

3.Newcastle United-1995-96

Bamwe mu barebye Premier League mu myaka ya kera ntabwo bakwibagirwa igihe Manchester United ikuramo ikinyuranyo cy'amanota 12 yari yarashyizwemo na Norwich mu mwaka w'imikino wo 1995-96.

Ikipe ya Newcastle United yatozwaga na Kevin Keegan yari yashyizemo ikinyuranyo cy'aya manota habura imikino 15 ngo shampiyona irangire ariko ibyakurikiyeho ni amateka. Iyi kipe yaragiye ijya mu bihe bibi ikajya itsindwa birangira Manchester United iyinyuzeho ijya ku mwanya wa mbere ndetse itwara igikombe iyirusha amanota 4.

2.Norwich- 1992-93

Muri uyu mwaka w'imikino ikipe ya Norwich yageze mu kwezi kwa 12 iri ku mwanya wa mbere aho yarushaga amanota 12 ikipe ya Manchester United yari ku mwanya wa 7.

Nyuma y'ukwezi kwa 12 ikipe ya Norwich ntabwo ibintu byayigendekeye neza dore ko hari n'aho yamaze imikino 6 itazi uko intsinzi isa. Ni mu gihe Manchester United yo yari mu bihe byiza irimo iratsinda dore ko imikino 7 ya nyuma yose yayitsinze bituma ijya ku mwanya wa mbere itwara igikombe irusha amanota 10 ikipe ya Norwich yayikurikiraga.

Iki cyari igikombe cya mbere cya shampiyona cya Manchester United nyuma y'imyaka 26 itazi uko gisa.

1. Manchester United-1997-98

N'ubwo Manchester United yagiye ikuramo ikinyuranyo cy'amanota menshi bikarangira yegukanye igikombe, ariko nayo byayibayeho birangira itwawe igikombe na Arsenal.

Muri uyu mwaka w'imikino Manchester United yasoje ukwezi kwa 12 ariyo iyoboye urutonde rwa shampiyona irusha Arsenal yayikurikiraga amanota 13. Ikipe ya Arsenal yari yagize ukwezi kwa 12 kubi dore ko mu mikino 8 yakinnyemo yari yashoboye gutsindamo imikino 2 gusa.

Ibi ariko byaje guhinduka nyuma ya Noheri kuko imikino 18 yakinnye, yatsinzemo 15 naho indi ikayinganya. Ni mu gihe Manchester United yo itari yorohewe biza kurangira Arsenal iyinyuzeho itwara igikombe iyirusha inota 1.