Minisitiri wa Siporo yijeje kubonera umuti ikibazo cy'abakinnyi n'umutoza bambuwe na Fatima WFC

Mu gitondo cyo kuri uyu wa Gatatu tariki ya 15 Mutarama 2025 ni bwo ku mbuga nkoranyambaga hacaracaye amashusho y'uyu mutoza n'abakinnyi basuka amarira batabaza inzego bireba kubishyuriza Padiri, Ferdinand Hagabimana uyobora iyi kipe.

Bamwe babinyujije ku rubuga rwa X basabye Minisitiri wa Siporo ko yakurikirana iki kibazo akaba yafasha aba bishyuza amafaranga babweremo n'ikipe.

Minisitiri Nelly Mukazayire nawe abinyujije ku rukuta rwe rwa X yavuze ko barimo baragikurikirana ndetse kikaba kigomba kubonerwa umuti urambye vuba.

Yanditse ati "Iki kibazo cyatugezeho kandi turimo gufatanya n'izindi nzego dukorana kugirango kibonerwe umuti urambye. Murakoze".

Umutoza wa Fatima WFC, Ntagisanimana Saida n'abakinnyi atoza bamaze amezi ane batazi uko umushara usa nkuko babyivugira kandi badasiba gukinira iyi kipe.

Iyo bagiye kwishyuza nyiri iyi kipe ari we Padiri Ferdinand Hagabimana rimwe na rimwe yifungirana aho akorera ntasohoke gusa mu minsi yashize bagiye kumwishyuza abateza bamwe mu bayobozi b'Umurenge batera ubwoba aba bakinnyi n'umutoza wabo kugira abone uko asohoka yigendere.

Kugeza ubu Fatima WFC iri ku mwanya wa 10 n’amanota umunani n’umwenda w’ibitego 14 mu mikino 12 imaze gukinwa muri shampiyona y’Abagore y’uyu mwaka w’imikino 2024-25.

Minisitiri wa Siporo yijeje ko ikibazo cy'abakinnyi n'umutoza bambuwe na Fatima WFC kizabonerwa umuti urambye 

Abakinnyi ba Fatima WFC bamaze amezi ane badahembwa 

Umutoza n'abakinnyi mu marira nyuma yo kujya kwishyuza nyiri ikipe ya Fatima WFC ahubwo akifungirana aho akorera