Benzema yahishuye ibyo gusubira muri Real Madrid n'icyo yabwiye Vinicius utaratwaye Ballon d'Or

Ikipe ya Real Madrid iri kubarizwa mu gihugu cya Arabia Saudite aho yagiye gukina imikino ya Super Cup ya Espagne. Mu minsi yashize abakinnyi b'iyi kipe basuwe na Karim Benzema usanzwe uba muri iki gihugu ndetse anagirana ikiganiro na Marca.

Aganira n'iki kinyamakuru yabajijwe kubyo yaganiriye n'abakinnyi ba Real Madrid ubwo yabasuraga kuri hoteli. Yavuze ko baganiriye ku bijyanye n'ubuzima busanzwe ndetse n'ibijyanye n'umupira w'amaguru.

Yagize ati "Twaganiriye cyane nkinshuti. Igitangaje, twaganiriye cyane ku buzima busanzwe kuruta umupira, byari byiza. Nk'urugero kuri Vinicius, twaganiriye kuri Ballon d'or, ariko mu buryo bwimbitse byari ikiganiro nabantu bose, ku bintu byoroshye, ku buzima".

Karim Benzema yavuze ko yabwiye Vinicius Junior ko atagomba gucika intege bitewe nuko atatwaye Ballon d'Or ahubwo ko agomba gukomeza gukora cyane bitewe nuko ari umukinnyi mwiza ndetse umunsi umwe akaba azayitwara.

Yavuze ko bishoboka ko yazasubira muri Real Madrid ndetse anavuga ko abizi neza ko azaba hafi y'iyi kipe.

"Yego, birumvikana, kubera iki. Kuri ubu ndi i Jeddah kandi ndimo ndakora neza cyane. Igihe kizagera cyo kureba uko ubuzima bumeze kandi nzi neza ko nzaba hafi ya Madrid".

Karim Benzema yavuze ko kandi Real Madrid ihora ari Real Madrid iba ifite amahirwe yo kwegukana ibikombe bityo ko nubu ifite ayo kwegukana icya Super Cup.

Yagize ati " Real Madrid ihora Real Madrid, ni ukuvuga, ni ikipe iba ihari ngo itware byose. Buri gihe bahora hano kuko batwara ibikombe none n'ubu bafite amahirwe yo gutsindira ikindi.

Karim Benzema yakiniye uReal Madrid imyaka 14 akaba yarayitwayemo ibikombe 4 bya shampiyona ya Espagne, ibikombe 5 bya Champions League ndetse n'ibikombe 3 bya Copa del Rey. Benzema kandi yatsinze ibitego 354, atanga imipira 165 yavuyemo ibitego mu mikino 648 yakinnye muri Real Madrid.

Ubwo Karim Benzema yasuraga Real Madrid 

Karim Benzema yagiriye inama Vinicius Junior yo kudacika intege kubera ko atatwaye Ballon d'Or 

Benzema yavuze ko gusubira muri Real Madrid bishoboka