Nshuti Innocent yasinyiye ikipe yo muri Azerbaijan

Iyi kipe niyo yabitangaje ku gicamunsi cyo kuri uyu wa Mbere tariki ya 7 Mutarama 2025. Iyi kipe yavuze ko yamusinyishije amasezerano azarangizanya n'uyu mwaka w'imikino.

Uyu mukinnyi yasinyiye iyi kipe nyuma yuko yaherukaga kuva mu Rwanda avuze ko hari amakipe agiye kiganiea nayo yo ku mugabane w'Iburayi ndetse bikaba byari byavuzwe ko yaba agiye gusinyira Zira FK nayo yo muri iki gihugu cya Azerbaijan yo isanzwe inakinamo myugariro w'Amavubi, Mutsinzi Ange.

Nshuti Innocent werekeje muri Sabail FK yaherukaga gutandukana na One Knoxville SC yo muri Leta Zunze Ubumwe za Amerika yari yaragezemo mu ntangiriro z'umwaka washize gusa kubona umwanya wo gukina bikaba byaragiye bimugora.

Uyu rutahizamu amaze iminsi yitwara neza mu ikipe y'Igihugu y'u Rwanda, Amavubi, atsinda ibitego birimo icyo yatsinze Afurika y'Epfo mu gushaka itike y'igikombe cy'Isi cya 2026, ikipe y'igihugu ya Libya, Benin niya Nigeria mu gushaka itike y'igikombe cy'Afurika cya 2025 kizabera muri Morocco.

Nshuti Innocent yakuriye mu ikipe y’Intare FC yagezemo afite imyaka 14, aza kuzamurwa muri APR FC mu 2015.

Mu 2018 yaje kuva mu ikipe y'Ingabo z'igihugu yerekeza mu ikipe ya Stade Tunisien yo muri Tunisia ariko ntabwo yatinzeyo nyuma y'umwaka umwe yahise ayigarukamo akaba ari nayo yari agikinamo kugeza mu ntangiriro z'umwaka washize mbere y'uko ajya muri One Knoxville SC.

Nshuti Innocent yasinyiye ikipe ya Sabail FK