Mashami Vincent watozaga Police FC yatandukanye nayo nyuma yuko iyi kipe itishimiye umusaruro wayiranze mu gice kibanza cya shampiyona.
Ni amakuru yagiye hanze ku gicamunsi cyo kuri uyu wa Gatatu tariki ya 8 Mutarama 2025. Uyu mutoza yatandukanye n'iyi kipe nyuma y'uko amasezerano ye yari yararangiye gusa bikaba byari muri gahunda ko azongera andi mu gihe azaba ari kuyifasha kwitwara neza gusa bikaba bitari biri gukunda.
Mbere yuko uyu mwaka w'imikino utangira Police FC ni imwe mu makipe yari yiyubatse aho yari yaguze abakinnyi barimo Yakubu Issa, Ani Elijah, Niyongira Patience, David Chimezie, Mandela Achraf, Kilongozi Richard, Nshimiyimana Simeon, Henry Msanga, Allan Katerega na Muhozi Fred.
Rero byari byitezwe ko izitwara neza ndetse ikaba yakwegukana igikombe cya shampiyona, gusa imikino ibanza iyi kipe yayisoje iri ku mwanya wa 3 ku rutonde rwa shampiyona aho irushwa amanota 13 na Rayon Sports ya mbere.
Usibye ibi kandi iyi kipe ntabwo yigeze yitwara neza mu mikino ya CAF Confederation Cup aho yasezerewe mu ijonjora ry'ibanze na CS Constantine yo muri Algeria.
Mashami Vincent avuye muri Police FC yari yaragezemo muri 2022 atwaranye nayo ibikombe 3 birimo igikombe cy'amahoro n'igikombe kiruta ibindi (Super Cup).
Police FC itandukanye n'umutoza wayo nyuma y'uko iheruka gusinyisha Byiringiro Lague wifuzwaga na Rayon Sports gusa bikarangira ariyo imutwaye.
Eng
RSS 
TANGA IGITECYEREZO