Ntwari Fiacre bikomeje kwanga! Uko abanyarwanda bakina hanze bitwaye mu Cyumweru cya mbere cya 2025

Kuwa Mbere w'icyumweru gishize, muri Shampiyona y'icyiciro cya mbere muri Libya ikipe ya Al Ahly Tripoli ikinamo Manzi Thierry yatsinze Al-Madina 2-0. Uyu mukinnyi w'Umunyarwanda yari yabanje mu kibuga ndetse nta nubwo yigeze asimbuzwa. 

Iyi kipe ya Al Ahly Tripoli iri ku mwanya wa 1 ku rutonde rwa shampiyona ikaba izasubira mu kibuga kuwa Gatanu w'iki Cyumweru ikina na Al Dhahra.

Kuwa Gatandatu ikipe ya Stade de Tunisien ikina shampiyona y'icyikiro cya mbere muri Tunisia ikaba inakinamo Mugisha Bonheur yatsinze Tataouine ibitego 3-1.

Ntabwo uyu mukinnyi w'Umunyarwanda yari yabanje mu kibuga bijyanye nuko yari yujuje amakarita y'imihondo ataramwemereraga gukina. Kugeza ubu ikipe ya Stade de Tunisien iri ku mwanya wa 2 ku rutonde rwa shampiyona aho inganya amanota na Monastir ya mbere.

Ku Cyumweru muri shampiyona y'icyiciro cya mbere muri Afurika y'Epfo, ikipe ya Kaizer Chiefs ikinamo Ntwari Fiacre yatsinzwe na Cape Town FC igitego 1-0. Kuri uyu mukino ntabwo uyu munyezamu w'Amavubi yari no ku ntebe y'abasimbura. 

Kugeza ubu Kaizer Chiefs iri ku mwanya wa 7 ku rutonde rwa shampiyona ikaba izasubira mu kibuga ikina na Stellenbosch kuwa Gatatu.

Kuwa Kane ikipe ya AEL Limassol ikina shampiyona y'icyiciro cya mbere muri Cyprus ndetse ikaba ikinamo Imanishimwe Emmanuel Manguende yatsinzwe na Apollon 1-0 muri shampiyona.

Kuri uyu mukino ntabwo uyu myugariro w'Amavubi yagaragaye gusa amakuru avuga yagize ikibazo cy'imvune akaba ariyo mpamvu atigeze ashyirwa no ku ntebe y'abasimbura.

Ikipe ya AEL Limassol iri ku mwanya wa 9 ku rutonde rwa shampiyona ikaba isubira mu kibuga ikina na Pafos kuri uyu wa Mbere saa Moya z'umugoroba.

Ku Cyumweru ikipe ya Raal La Louviere yo mu cyiciro cya kabiri mu Bubiligi ikaba inakinamo Samuel Gueulette, yatsinze Royal Antwerp 1-0 mu mukino wa gicuti. Uyu munyarwanda yarifashishijwe muri uyu mukino ndetse ni nawe watsinze iki gitego. 

Muri shampiyona Raal La Louviere izasubira mu kibuga ku Cyumweru tariki 12 ikina na SK Beveren.

Ntwari Fiacre ntakibona umwanya wo kujya ku ntebe y'abasimbura kandi mu ntangiriro za shampiyona ni we wari umunyezamu wa mbere