Bwa mbere Shenseea agiye gukorera igitaramo muri Kenya

Uyu muririmbyi w’ijwi rikundwa n’abatari bake ku isi yose, yatangaje inkuru ishimishije ku mbuga nkoranyambaga, aho yashyizeho amagambo agira ati:“Kenya, ndaje”, agaragaza ko yiteguye gusura iki gihugu gifite amateka akomeye mu muziki w’Afurika. Aya magambo ye yahise aba ikimenyabose, ahabwa urukundo rudasanzwe n’abakunzi b’umuziki muri Kenya no muri Afurika yose.

 Shenseea ni umwe mu bahanzi bari kwigarurira imitima y’abafana b’umuziki ku rwego mpuzamahanga, cyane cyane binyuze mu njyana ya Dancehall n’iya Afrobeats. Indirimbo ze zakunzwe cyane nka "Lighter", "Blessed" na "Hit and Run", zatumye amenyekana nk’umuhanzikazi ufite impano idasanzwe.

 Kenya, kimwe mu bihugu bifite isoko rikomeye ry’umuziki muri Afurika, ni hamwe mu hantu hifuzwa cyane n’abahanzi mpuzamahanga bifuza kugera ku bafana benshi. Abakunzi b’umuziki muri iki gihugu bamaze igihe bifuza kubona Shenseea ku rubyiniro rwaho, bityo iki gitaramo kikaba gitegerejweho kuba ikirori gikomeye gisoza umwaka wa 2024.

 Shenseea yavuze ko iki gitaramo ari amahirwe adasanzwe, kandi ko yishimiye gufasha mu kubaka umubano ukomeye hagati y’abahanzi bo muri Afurika n’abo hanze yayo. Mu magambo ye yuje ibyishimo yagize ati:“Gukorera muri Kenya ni intambwe ikomeye ku rugendo rwanjye. Ndashaka gusangira ibyishimo n’abafana banjye bo muri Afurika, cyane cyane abo muri Kenya. Twitege ibihe bidasanzwe!”

Igitaramo cya Raha Fest cyitezweho guhuruza ibihumbi by’abafana, kikaba ari umwanya wihariye wo kwishimira injyana zitandukanye mu mpera z’umwaka. Shenseea, uzwiho kugirana umubano wihariye n’abafana be, yijeje abazitabira ko azabereka urukundo mu buryo budasanzwe, kandi ko azabaha umuziki udasanzwe.

Kenya izwiho kuba isoko ry’umuziki rihanzwe amaso muri Afurika y’Iburasirazuba, kandi benshi mu bahanzi mpuzamahanga bahamya ko kuhakorera ibitaramo ari intambwe ikomeye mu gukomeza kwagura ibikorwa byabo. Shenseea yahisemo neza kwifatanya n’abakunzi b’umuziki muri iki gihugu gifite umuco wihariye wo gukunda umuziki.

Ntibikiri ibanga, Raha Fest ni kimwe mu bitaramo bikomeye biteganyijwe guhuza abafana b’injyana zitandukanye, kandi Shenseea ari ku isonga y’abahanzi bazataramira abitabira ibi birori.

">IMWE MU NDIRIMBO ZE ZAKUNZWE

">

Umwanditisi: Nkusi Germain