Yatsinzwe inshuro ebyiri: Ibyo wamenya kuri John Mahama wongeye gutorerwa kuyobora Ghana

Mahama wayoboye Ghana hagati ya 2012-2017, yagize amajwi 57,4% mu gihe Mahamudu Bawumia w'Ishyaka New Patriotic Party, ryari riri ku butegetsi, yagize amajwi 41,4% nk'uko ibarura ry'agateganyo ribigaragaza.

Mbere y’uko ayobora Ghana muri iyo myaka yatambutse, Mahama w’imyaka 66 y’amavuko  yanabaye Visi Perezida kuva mu 2009 kugeza mu 2012.

Yatsinzwe mu matora y’Umukuru w’Igihugu yabaye mu 2016 ubwo ishyaka NPP rya Nana Akufo-Addo ryamurushaga amajwi. Yongeye kugerageza mu matora ya 2020 ariko nabwo aratsindwa.

Mahama yabaye Minisitiri w’itumanaho wungirije hagati ya Mata 1997 na Ugushyingo 1998.

Mu 2021, nibwo Umuryango wa Afurika Yunze Ubumwe, watoranyije John Mahama nk’intumwa yawo mu biganiro bigamije kumvikanisha impande zombi muri Somalia kugira ngo hazabeho amatora anyuze mu mucyo.

Mu ntangiriro z’uyu mwaka, John Dramani Mahama wahoze ari Perezida wa Ghana, yatangaje ko adashobora gushyigikira abaryamana n’abo bahuje ibitsina kuko bihabanye n’imyizerere ye ya gikristu.

Ibi yabitangaje mu gihe Ghana yari iri ku gitutu nyuma y’uko mu 2023 Inteko Ishinga Amategeko yashyigikiye ivugururwa ry’umushinga w’itegeko ryamagana abaryamana bahuje ibitsina.

Icyo gihe yabwiye abayobozi b’amadini ati: “Ukwizera kwanjye ntabwo kunyemerera kwemerera umugabo gushyingiranwa n’undi mugabo cyangwa umugore ku mugore. Ntabwo nizera ko umuntu ashobora kubyuka akavuga ngo ariyumva nk’umugabo kandi yaravutse ari umugore agahindura agatangira kwitwara kigabo.”

John Mahama wongeye gutorerwa kuyobora Ghana, yabonye izuba ku ya 29 Ugushyingo 1958, avukira mu gace kitwa Damongo muri iki gihugu. Se umubyara, Emmanuel Mahama, wari umuhinzi w’umuceri w’umukungu, na we yari umuyobozi ukomeye muri Repubulika ya mbere yari iyobowe na Perezida wa mbere wa Ghana, Kwame Nkrumah.

Perezida Mahama, afite impamyabumenyi mu by’itumanaho yakuye muri Kaminuza ya Ghana mu 1986. Afite n’indi mpamyabumenyi mu birebana no kwita ku buzima bwo mu mutwe, yakuye mu Ishuri Rikuru ry’Imibereho Myiza riherereye i Moscow muri Leta Zunze Ubumwe z'Abasoviyeti.

Mahama yashakanye na Lordina Mahama, babyarana abana batanu barimo uwitwa Sharaf wahoze akinira Rostocker FC nka rutahizamu. Ni umukristu wavukiye akanakurira ubarizwamo abakristu n’abayisilamu. Kuri ubu, uyu muyobozi mushya wa Ghana, asengera mu itorero ryitwa Assemblies of God.