Ni Umunsi Mpuzamahanga w’abafite ubumuga! Menya ibyaranze uyu munsi mu mateka

Ibintu biba byarabaye kuri iyi tariki mu myaka yashize ni byinshi cyane ariko uyu munsi, InyaRwanda yaguhitiyemo bimwe mu by’ingenzi bidateze kwibagirana mu mateka y’isi.

Uyu munsi ni umunsi mukuru wa Mutagatifu Francis Xavier.

Uyu munsi kandi, ni Umunsi Mpuzamahanga wahariwe abafite ubumuga, ukaba warashyizweho n’Umuryango w’Abibumbye (United Nations' International Day of Persons with Disabilities).

Bimwe mu byaranze uyu munsi mu mateka:

915: Papa Yohani X yambitse ikamba Berengar I w’u Butaliyani nk’Umwami w’Abami b’Abaromani.

1818: Illinois yabaye Leta ya 21 ya Leta Zunze Ubumwe za Amerika.

1959: Nyuma y’amezi 6 igihugu cya Singapore kibonye ubwigenge mu bwami bw’abongereza cyashyizeho ibendera ryacyo rikaba ari naryo kigikoresha kugeza ubu.

1967: Bwa mbere, mu bitaro bya Groote Schuur biherereye mu mujyi wa Cape Town muri Afurika y’epfo, igikorwa cyo guhindura umutima mu muntu cyakorewe kuri Louis Washkansky w’imyaka 53 y’amavuko.

1976: Abicanyi bashatse kwica umuhanzi Bob Marley, bamurasa inshuro 2 ariko ararusimbuka ndetse nyuma y’iminsi 2 akora igitaramo.

1984: Umwuka wa methyl isocyanate, wasohotse ku bw’impanuka mu ruganda rukora imiti y’imyaka rwa  Union Carbide muri Bhopal, mu Buhinde maze abantu basaga 3800 bahita bahasiga ubuzima, ndetse abandi babarirwa hagati y’150,000 na 600,000 barakomereka, abandi 6,000 bitaba Imana nyuma kubera ibikomere, iki kikaba aricyo kiza cya mbere cyabayeho mu mateka y’inganda ku isi.

1989: Mu gihe cy’intambara y’ubutita, perezida George H. W. Bush (se wa Bush) yahuye na perezida w’uburusiya Mikhail Gorbachev bahurira ku nkombe za Malta, aho nyuma y’iyi nama baje gutangaza ko intambara y’ubutita hagati y’umuryango wa OTAN n’uburusiya irangiye.

1992: Itegeko numero 794 ry’akanama k’umuryango w’abibumbye gashinzwe umutekano rishyiraho umutwe w’ingabo zo gucunga amahoro  muri Somalia ryatangiye gukurikizwa maze hajyaho umutwe w’ingabo UNITAF uyobowe na Leta zunze ubumwe za Amerika muri Somalia.

1997: Mu mujyi wa Ottawa, muri Canada, abahagarariye ibihugu byo hirya no hino ku isi bagera ku 121 basinye amasezerano yo guhagarika ikorwa ry’ibisasu bitegwa abantu, ariko Amerika, ubushinwa, n’uburusiya banga gusinya kuri ayo masezerano.

1999: Itumanaho rya NASA ryaracitse ntiryahuza umurongo na Mars Polar Lander ubwo icyo cyogajuru cyari gitangiye kwinjira muri atmosphere y’umubumbe wa Mars.

2009: Igitero cy’ubwiyahuzi cyahitanye abantu 25 muri Somalia mu Mujyi wa Mogadishu, barimo n’abaminisitiri batatu bo muri Leta y’inzibacyuho.

Bamwe mu bavutse kuri uyu munsi:

1884: Rajendra Prasad, perezida wa mbere w’ubuhinde nibwo yavutse azagutabaruka mu 1963.

1927: Andy Williams, umuririmbyi akaba n’umukinnyi wa filime w’umunyamerika nibwo yavutse aza kwitaba Imana mu 2012.

1952: Mel Smith, umukinnyi wa filime zisekeje, akaba n’umuyobozi wa filime w’umwongereza nibwo yavutse aza kwitaba imna mu 2013.

1960: Julianne Moore, umukinnyikazi wa filime w’umunyamerika nibwo yavutse.

1965: Steve Harris, umukinnyi wa filime w’umunyamerika nibwo yavutse.

1970: Christian Karembeu, umukinnyi w’umupira w’amaguru w’umufaransa yabonye izuba.

1975: Malinda Williams, umukinnyikazi wa filime w’umunyamerika nibwo yavutse.

1978: Trina, umuraperikazi w’umunyamerika nibwo yavutse.

1978: Daniel Alexandersson, umukinnyi w’umupira w’amaguru w’Umunyasuwedi.

1980: Laryea Kingston, umukinnyi w’umupira w’amaguru w’umunya-Ghana.

1981: David Villa, umukinnyi w’umupira w’umunya Espagne nibwo yavutse.

1982: Michael Essien, umukinnyi w’umupira w’amaguru w’umunya-Ghana.

1985: Amanda Seyfried, umukinnyikazi wa filime akaba n’umubyinnyikazi w’umunyamerika.

1990: Christian Benteke, umukinnyi w’umupira w’amaguru w’umubiligi.

2005: Igikomangoma Sverre Magnus wa Norvège.

Bamwe mu bitabye Imana uyu munsi:

1888: Carl Zeiss, umunyabugenge w’umudage, akaba ariwe wakoze icyuma cya mbere kifashishwa mu kureba amashusho yitabye Imana, ku myaka 72 y’amavuko.

1989: Connie B. Gay, umushoramari w’umunyamerika akaba ariwe washinze ishyirahamwe rihuza abahanzi b’injyana ya country yitabye Imana ku myaka 75 y’amavuko.

2009: Richard Todd, Umwongereza wakinaga Sinema.