Ruben Amorim yagaragaje ko yiteguye neza urugamba rwo muri English Premier League -VIDEO

Nyuma yo gusimbura Erik ten Hag, Amorim yagaragaje icyizere mu kiganiro n’itangazamakuru, ashimangira ko afite ubushobozi bwo kuba umunyembaraga igihe bibaye ngombwa, ati:"Hari igihe cyo kwishima, hari n’igihe cyo gukora cyane. Iyo bikenewe, nshobora kuba umuntu w’inkazi."

Amorim yanavuze ko nubwo akora ku buryo bwiganjemo umutuzo, ibyo ntibivuze ko adashobora gushyira imbaraga mu kuyobora ikipe mu gihe hakenewe igitsure.

Ati: "Ndi umuntu uzabasha kuba uwo mwari mwiteze. Niba abakinnyi bakorera hamwe nk’ikipe, nzaba umuntu mwiza cyane. Ariko niba hari uzishyiriraho ibye, nzahinduka undi muntu."

Manchester United, iri ku mwanya wa 13 muri shampiyona, yitegura guhura na Ipswich Town kuri iki Cyumweru tariki 24 Ugushyingo 2024.

Amorim yahawe akazi hagati muri shampiyona, ibintu avuga ko bitaba byoroshye, ati: "Bigora cyane kujya mu ikipe hagati mu mwaka kuko uba ukeneye kumenya abakinnyi mu mikino aho kubamenyera mu myitozo."

Yongeyeho ko ikintu gikomeye ari uko igihe cyo gukosora amakosa mu myitozo kiba gito cyane, cyane cyane iyo ikipe iri gutakaza imikino.

Nyuma y’umukino wa Ipswich, Manchester United izakira Bodo/Glimt ku mukino wa mbere wa Amorim kuri Old Trafford muri Europa League, mbere yo guhura na Everton mu mukino wa shampiyona.

Iyi mikino ni intangiriro y’iminsi 42 izaba ikomeye cyane kuri Amorim, aho ikipe izakina imikino 12.

Amorim yagize ati: "Ahantu hakomeye ho guteza imbere ikipe ni mu myitozo, ariko bigorana cyane iyo ukoresha amashusho cyangwa imyitozo yo gusubirana imbaraga."

Yashimangiye ko bazashaka inzira zo guhangana n’iki kibazo. 

Ruben Amorim yiteguye urugendo rushya rwe nk’umutoza wa Manchester United, afite icyizere cyo kugarura ikipe ku murongo