Rwanda Premier League: Mugiraneza Frodouard yafashije APR FC kwikura mu nzara za Muhazi United

Kuri uyu wa Gatandatu tariki 23 Ugushyingo 2024 ikipe ya APR FC yari yakiriye Muhazi United mu mukino w’umunsi wa 10 wa shampiyona y’u Rwanda, Rwanda Premier League 2024-25.

Ni umukino amakipe yombi yamanutse mu kibuga ashaka gutsinda, kuko mbere y’uko utangira APR FC yari ifite amanota 8, ikipe ya Muhazi United yo yari ifite amanota 10.

Abakinnyi babanje mu kibuga ku ruhande rwa Muhazi United ni: Amani, Joseph Sackey, Muhimoundu, Murwngamirwa, Muyombo, Mbanza, Koumba, Kagaba, Babua, Marcel na Karanzi Joseph.

Abakinnyi babanje mu kibuga ku ruhande rwa APR FC ni: Pavelh, Souane, Niyigena, Niyomugabo, Byiringiro, Mugiraneza, Niyibizi, Lamine Bah, Dushimirimana Olivier, Mugisha Gilbert na Mbaoma.

Umukino watangiye APR FC iri gukinana imbaraga zidasanzwe kuko mu minota ine ya mbere yisirisimbye imbere y'izamu rya Muhazi United inshuro esheshatu ariko bitagize icyo nimara.

Ku munota wa 6 APR FC yabonye kufura yatewe na Victor Mbaoma, igarurwa n'urukuta rwa Muhazi United. Ku munota wa Munani APR FC yongeye kurata uburyo bukomeye bwa Victor Mbaoma, ateye umupira awushora umuzamu wa Muhazi United Twagirayezu Aman.

Mu minota 17 ya mbere Ikipe ya APR FC yagumye gukinana imbaraga zidasanzwe, ari na ko Mugiraneza Frodouard wari wahawe amahirwe yo kubanza mu kibuga yari akomeje gufasha ikipe mu mbaraga zidasanzwe.

Ikipe ya APR FC yagumye kugaragaza imbaraga n'inyota yo gushaka igitego, bigatuma umupira abakinnyi bayo babonye bawukinana igihunga. Ku munota wa 25 Migisha Gilbert yabonye umupira maze arekura ishoti rikomeye ryanyuze hejuru y'izamu.

Ku munota wa 36 Mugiraneza Frodouard wari uhagaze neza yatsinze igitego cya mbere cya APR FC inatangira kuyobora umukino ku gitego kimwe Ku busa bwa Muhazi United.

Igitego cya APR FC cyatiinzwe na Mugiraneza Frodouard cyazamuye imbaraga z'abakinnyi ba APR FC, ariko iminota 45 yatangiye nta gitego cya kabiri kiraboneka, hongerwaho iminota ibiri nayo itaguze icyo itanga. Igice cya mbere cyarangiye APR FC ifite igitego kimwe Ku busa bwa Muhazi United.

Igice cya kabiri cyagarukanye imbaraga zikomeye kuri APR FC Mugisha Gilbert, Tuyisenge Arsene na Mugiraneza Frodouard bari gukinana ubuhanga bwo ku rwego two hejuru.

Ku munota wa 50 Tuyisenge Arsene yazamukanye umupira imbere y'izamu rya Muhazi United, umuzamu wa Muhazi na ba myugariro bayo bakumbagara hasi nyuma yo kugarura amashoti ya Mugiraneza Frodouard na Niyigena Clement.

Ikipe ya APR FC kubona igitego byatumye isubira inyuma ikina iri kukirinda, ibintu byatumye umukino ugera ku munota wa 90 nta kirahinduka kuri Kigali Peel Stadium, maze abasifuzi bongeraho iminota ine y'inyongeran nayo yarangiye nta gihindutse. 

Gutsinda uyu mukino byatumye APR FC itangira kuva mu myanya iteye isoni, ijya ku mwanya wa 9 n'amanota 11, mu gihe ikipe ya Muhazi United yo gutsindwa uyu mukino byatumye ifata umwanya wa 10 n'amanota 10.

Ikipe ya APR FC yatsinze Muhazi United itangira kuva mu myanya iteye isoni

Mugiraneza Frodouire utahabwaga umwanya wo gukina ni we watwaye APR FC ku mugongo