Umunya-Denmark yegukanye ikamba rya Miss Universe 2024, umugore aca agahigo, Chidmma wa Nigeria ahesha ishema Afurika – AMAFOTO

Victoria Kjær Theilvig ukomoka muri Denmark yanditse amateka mashya, aba umukobwa wa mbere wegukanye ikamba rya Miss Universe ryaberaga mu mujyi wa Mexico muri Mexique, ahigika abandi bakobwa bari bahanganye.

Ni mu gihe Chidimma Adetshina wo muri Nigeria washinjwe kwiyita Umunya-Afurika y’Epfo mu irushanwa yari ahatanyemo rya Miss South Africa 2024 mu buryo butemewe, yabaye igisonga cya mbere, Maria Fernanda Beltran wo muri Mexique aba igisonga cya kabiri, akurikirwa na Suchata Chuangsri wo muri Thailand na Ileana Marquez Pedroza wa Venezuela.

Uyu Ileana Marquez Pedroza wabaye igisonga cya Kane, ni umugore w’imyaka 28 y’amavuko, akaba afite abana. Ni we wa mbere wabimburiye abandi muri gahunda itangijwe vuba yemerera abarengeje imyaka 28 guhatanwa muri iri rushanwa.

Theilvig wambitswe ikamba afite imyaka 21, akaba asanzwe ari umubyinnyi, rwiyemezamirimo n’umunyamategeko. Yari ahanganye na bagenzi be 126.

Ikamba rya Miss Universe, Theilvig yaryambitswe na Sheynnis Palacios wo muri Nicaragua wari urisanganywe.

Mu iri rushanwa ryabaye ku mugoroba wo kuri uyu wa Gatandatu, abakobwa bagiye bahatana mu byiciro aho habanje gutoranywamo 30 bakomeza, bigera kuri 12 ndetse na batanu ba mbere aribo bavuyemo Miss Universe 2024.

Batanu ba mbere babajijwe ibibazo bitandukanye birimo ibijyanye n’imiyoborere n’ibindi.

Chidimma Adetshina wari warabashije kugera mu bakobwa 11 bageze mu cyiciro cya nyuma bahataniye Ikamba rya Nyampinga wa Afurika y’Epfo, akaza kwikura muri iri irushanwa, yatorewe kuba Miss Universe Nigeria 2024 mu ijoro ryo ku wa Gatandatu tariki 31 Kanama.

Mu butumwa yashyize ku mbuga nkoranyambaga, yagaragaje ko kwambikwa iri kamba ari inzozi zabaye impamo.

Yagize ati “Mbega uru rugendo rudasanzwe uko rwari rumeze! Guhagarara hano nka Miss Universe Nigeria ni inzozi zabaye impamo. Ndishimye cyane kandi nicishije bugufi ku bwo kwambara iri kamba iri joro.”

Yashimiye umuryango we wabanye nawe mu bihe bikomeye ndetse n’inshuti ze zamufashe mu mugongo ubwo yari yibasiwe.

Mu butumwa yanditse ku mbuga nkoranyambaga asezera ku wa 8 Kanama, ubwo yikuraga mu irushanwa rya Miss South Africa, Chidimma Adetshina yagaragaje ko yahisemo gufata iki cyemezo ku bw’impamvu ze bwite.

Chidimma Vanessa Onwe Adetshina, yari yijunditswe ubwo yinjiraga muri iri rushanwa ashinjwa kurijyamo ari umunyamahanga dore ko bamwe bavugaga ko ari Umunya-Nigeria kuko ariyo nkomoko y’ababyeyi be, bityo adakwiriye kwiyamamaza mu marushanwa areba abanyafurika y’Epfo.

Nyuma yo kuva mu irushanwa rya Nyampinga wa Afurika y’Epfo yahise atumirwa muri Miss Universe Nigeria, nta kuzuyaza ahita abyemera.

Uyu mukobwa Nyina afite ibisekuru byo muri Mozambique mu gihe se akomoka muri Nigeria. Mu bucukumbuzi bwakozwe ubwo yari yijunditswe, bwagaragaje ko ‘nyina yibye ibyangombwa’ ari nabyo byatumye ategekwa kwikura mu irushanwa.

Victoria ubwo yambikwaga ikamba rya Miss Universe 2024 byamurenze

Ni umukobwa w'imyaka 21 y'amavuko gusa

Chidimma wacunagujwe yagizwe igisonga cya mbere

Pedroza wa Venezuela ufite abana ni we wagizwe igisonga cya kane

Abimburiye abandi kuri uyu mwanya mushya uherutse kongerwa mu irushanwa

Umunya-Kenya Irene Mukii ni uko yaserutse

Sakhile Dube wo muri Zimbabwe

Emilia Dides ubwo yaserukiraga Colombia

Juliana Barrientos wa Bolivia ari mu biyerekanye mu myambaro idasanzwe igaragaza umuco wabo