Volleyball: APR zombi zatsinze Kepler

Ni mu mikino yakinwe kuri uyu wa Gatanu tariki ya 15 Ugushingo 2024 muri Gymnasium y'Akarere ka Gisagara.

Umukino wabanje gukinwa ni uwo mu bagore ikipe ya APR VC yatsinzemo Kepler VC mu buryo bworoshye amaseti 3-0. Ikipe y'Ingabo z'igihugu yegukanye iseti ya mbere ku manota 25-19, yegukana iya kabiri ku manota 25-20 naho iya gatatu iyegukana ku manota 25-18.

Nyuma y'uyu mukino,Saa moya zuzuye mu bagabo APR VC na Kepler VC zahise zitana mu mitwe. Aya makipe yombi yahuriye ku mukino wa nyuma wa shampiyona iheruka yakinnye iseti ya mbere ahanganye cyane gusa birangira APR VC iyegukanye ku manota 26-24.

Mu iseti ya Kabiri Kepler VC yaje ikubita agatoki ku kandi maze igenda imbere ya APR VC birangira ari nayo iyegukanye ibifashijwemo n'abasore bayo barimo Dusengimana Wyclif,Mutabazi Yves ,Mahoro Yvan n'abandi.

Mu iseti ya gatatu nabwo amakipe yombi yongeye guhangana mu buryo bukomeye , birangira APR VC iyegukana itsinze amanota 31-29. 

Mu iseti ya kane, Kepler VC yaje iri imbere gusa bigeze mu manota 20 iza kwirangaraho birangira APR VC iyiciyeho ndetse ihita inayegukana ku manota 26-24 maze muri rusange iba yegukanye itsinzi y'amaseti 3-1.

Ku munsi w'ejo ku wa Gatandatu n'ubundi ibirori bya Volleyball bizakomereza mu karere ka Gisagara na Huye. Mu bagabo imikino yose izakinirwa kuri Gymnasium y'akarere ka Gisagara aho Saa Yine Gisagara VC izakina na Kepler VC,Saa munani Police VC ikine na RP Ngoma naho Saa kumi REG ikine EAU Rwanda .

Mu bagore ho imikino izakinirwa muri Gymnasium ya Kaminuza y'u Rwanda, Ishami rya Huye na Gisagara aho RRA izakina na RP Huye Saa yine ,EAU Rwanda ikine na Ruhango VC Saa Sita naho Wisdom ikine na Police nabwo Saa Sita.