Paul Pogba yatandukanye na Juventus

Ikipe ya Juventus niyo yatangaje ko yatandukanye n'uyu mukinnyi ndetse inamwifuriza amahirwe masa ku hazaza he ibinyujije ku mbugankoranyambaga zayo mu mugoroba wo kuri uyu wa Gatanu tariki ya 15 Ugushingo 2024.

Paul Pogba nawe abinyujije ku mbuga nkoranyambaga ze, yavuze ko atazibagirwa urukundo abafana b'iyi kipe bamweretse.

Yanditse " Hari igihe ibintu bitagenda uko dushaka ariko ikintu kimwe ntashidikanyaho ; ni urwibutso mfitanye namwe, bafana nkunda, ntabwo ruzibagirana.  

Wampaye byinshi, birenze ibyo nshobora gushyira mu magambo kandi nzahora nitwaza urukundo rwose wampaye.uzahora mumutima wanjye buri gihe. Amahirwe masa Juventus".

Paul Pogba wari usigaranye amasezerano y'umwaka umwe muri Juventus atandukanye nayo ku bwumvikane nyuma y'uko aherutse kugabanyirizwa ibihano yari yarafatiwe kubera gupimwa agasangwamo ikigero kidasanzwe cy’imisemburo yongera imbaraga za kigabo izwi nka "testosterone" bikaba byaravuye ku myaka ine bijya ku mezi 18.

Uyu mukinnyi w'imyaka 31 yasubiye muri Juventus mu 2022 avuye muri Manchester United gusa kuva yagerayo yakunze kurangwa n'ibibazo by'imvune. Yaherukaga kuyikinira umukino mu kwezi kwa 11 mu mwaka ushize ku mukino bari bakinnyemo na Empoli nabwo yari yinjiyemo asimbuye.

Paul Pogba azasubira mu myitozo mu kwezi kwa mbere k'umwaka utaha akaba azaba yemerewe gukina mu kwezi kwa 4 mu mwaka utaha.

Paul Pogba watandukanye na Juventus