Basketball: Olivier Turatsinze yerekeje muri Patriots Basketball Club

Turatsinze yavuye muri Espoir aho yari amaze kumenyekana nk’umukinnyi w’ingenzi ndetse yagize uruhare mu gufasha iyi kipe gusoreza ku mwanya wa Gatatu muri Shampiyona ya Basketball y’u Rwanda ya 2023.

Turatsinze yitwaye neza ku giti cye muri shampiyona, aho yatowe nk’umukinnyi w’imikino ya shampiyona (MVP) mu mwaka wa 2023, nyuma yo kwitwara neza mu gutsinda, aho yarangije ari we uyoboye abatsinze amanota menshi agira amanota 507.

Olivier Turatsinze yinjiye muri Patriots Basketball Club iherutse gutakaza abakinnyi bakomeye nka Steven Hagumintwari (Small Forward) na Dieudonne Ndizeye (Power Forward), bombi bagiye muri Rwanda Energy Group (REG BBC)

Turatsinze kandi afite ubunararibonye mu ikipe y’igihugu kuva mu mikino y’abakiri bato kugeza ku rwego rw’abakuru. Mu 2018, yahamagawe mu ikipe y’igihugu y’abatarengeje imyaka 18, maze afasha u Rwanda kuza ku mwanya wa Gatandatu mu irushanwa rya Afrobasket ryabereye muri Mali, aho yatsinze amanota 5.4 n’imipira ifatirwa hejuru 2.8 ku giteranyo cyimikino yose yakinnye.

Mu mwaka wa 2023, Turatsinze yitwaye neza ubwo yahamagawe bwa mbere mu ikipe y’igihugu y’abakuru aho yari mu ikipe y’u Rwanda yegukanye Umudali wa Bronze mu irushanwa rya AfroCAN ryabereye muri Angola.

Mu mwaka wa 2022 kandi Turatsinze yigaragaje mu irushanwa rya FIBA 3x3 Africa Cup ryabereye i Cairo mu Misiri, aho yafashije u Rwanda kwegukana umwanya wa Gatatu, batsinze Tunisia amanota 21-17.

Yanabaye mu ikipe y’u Rwanda yitabiriye FIBA 3x3 World Cup yabereye muri Israel muri Gicurasi 2023.

Turatsinze Olivier yerekeje mu ikipe ya Patriots BBC