Kuri uyu wa Gatatu itariki 6 Ugushyingo 2024 ikipe ya Arsenal irakinana Inter Milan mu mukino w’umunsi wa kane mu matsinda ya UEFA Champions League. Ni umukino abakunzi ba Arsenal bashobora kongera kubona Martin Ødegaard agaruka mu kibuga nyuma y’uko ikipe yari imaze gukina imikino 12 itamufite.
Kapiteni wa Arsenal, Martin Ødegaard, ashobora kugaruka mu kibuga ubwo ikipe itozwa na Mikel Arteta iraba ihanganye na Inter Milan mu mukino wa Champions League kuri uyu wa Gatatu.
Uyu mukinnyi wo hagati w’imyaka 25, yari amaze iminsi atagaragara mu mikino kubera imvune y’imitsi yo ku kuguru yagize ubwo yari mu ikipe y’igihugu mu kwezi kwa Nzeri.
Iyi mvune yatumye amara imikino 12 adakina, ariko yakoze imyitozo hamwe na bagenzi be ku kibuga cya Arsenal i London Colney kuri uyu wa Kabiri mbere y'uko berekeza i Milan.
Umutoza w’iyi kipe, Mikel Arteta, yatangaje ko aza gufata umwanzuro wo gukinisha Odegaard kuri uyu wa Gatatu, agira ati: "Yagarutse vuba ugereranyije n’uko twabitekerezaga, ariko ni inkuru nziza kuba yongeye kugaruka."
Arteta kandi yemeje ko Bukayo Saka aza kuyobora ikipe nk’umuyobozi wa bagenzi be (Kapiteni) mu kibuga kuri uyu mukino wa Inter Milan, icyerekana ko Odegaard ashobora gutangira umukino ari ku ntebe y’abasimbura.
Arsenal imaze imikino itatu idahirwa muri Premier League, aho yabuze amanota umunani muri icyenda imaze gukinira, ubu ikaba iri ku mwanya wa gatanu mu gihe irushwa amanota arindwi na Liverpool iyoboye urutonde.
Mu mikino ya Champions League, Arsenal iri mu bihe byiza kuko yatsinze imikino ibiri iheruka, ikaba ifite amanota arindwi ku rutonde. Inter Milan nayo ifite amanota arindwi, nyuma yo gutsinda Young Boys na Red Star Belgrade ndetse no kunganya na Manchester City.
Martin avuye mu mvune asanga ikipe ayoboye itari kwitwara neza muri shampiyona y'u Bwongereza)
Martin Ødegaard yavunikiye mu ikipe y'igihugu ya Noruveje
Eng
RSS 
TANGA IGITECYEREZO