Abitezweho gucungura Amavubi kuri Djibouti bafite amahirwe yo gutsinda angana na 15 % ku mukino

Ku Cyumweru tariki  20 Ukwakira 2024, nibwo umutoza w'ikipe y'igihugu y'u Rwanda,Amavubi, Torsten Frank Spittler yashyize hanze urutonde rw'abakinnyi azifashisha akina n'ikipe y'igihugu ya Djibouti mukino w'ijonjora rya mbere ryo gushaka itike ya CHAN 2024.

Muri aba bakinnyi abo yahamagaye bakina basatira ni abakinnyi 8 aribo; Ramadhan Niyibizi,Arsene Tuyisenge, Olivier Dushimimana na Gilbert Mugisha bakinira APR FC,Hadji Iraguha ukinira Rayon Sports,Kabanda Serge ukinira Gasogi United,Iyabivuze Osee ukinira AS Kigali na Mbonyumwami Taiba ukinira Marine FC.

Aba bakinnyi bazaha bahetse Amavubi mu bijyanye no gusatira bose hamwe mu mikino ya shampiyona y'icyiciro cya mbere mu Rwanda igeze ku munsi wa Gatandatu bose bamaze gutsinda ibitego 4 mu mikino 27 bakinnye.

Mugisha Gilbert amaze gukina umukino umwe akaba nta gitego aratsinda ndetse nta n'umupira ukivamo aratanga,Tuyisenge Arsene amaze gukina imikino ibiri akaba nta gitego aratsinda gusa yatanze umupira umwe wakivuyemo, Dushimimana Olivier 'Muzungu' nta gitego aratsinda nta n'umupira ukivamo aratanga mu mukino umwe  amaze gukina,Niyibizi Ramadhan nawe amaze gukina imikino 2 akaba nta gitego aratsinda ndetse n'umupira ukivamo aratanga.

Iraguha Hadji amaze gukina imikino 5 yatsinzemo igitego 1 ndetse anatanga umupira umwe wakivuyemo,Kabanda Serge amaze gukina imikino 5 atanga umupira wakivuyemo, Iyabivuze Osee amaze gukina imikino 6 akaba yaratsinze igitego gusa nta n'umupira ukivamo aratanga na Mbonyumwami Taiba wakinnye imikino 5 akaba yaratsinzemo igitego 1 ndetse akaba yaranatanze  imipira 3 yabivuyemo.

Uramutse ubaze neza ndetse ukanashyira ku ijanisha ubonako nibura aba bakinnyi bazaba bari gushakira ikipe y'igihugu y'u Rwanda, Amavubi ibitego bafite amahirwe angana na 15 % ku mukino bijyanye n'imikino bose bamaze gukina.

Umukino ubanza wo mu ijonjora ry'ibanze uzakinwa tariki ya 27 Ukwakira, mbere y’uko u Rwanda rwakira Djibouti tariki ya 31 Ugushyingo; imikino yombi ikazabera kuri  Stade Amahoro i Remera bitewe n’uko Djibouti iri mu bihugu 11 CAF yemeje ko nta Stade bifite zo kwakira imikino mpuzamahanga yo ku rwego rwa FIFA na CAF.

Mu gihe Amavubi yazasezerera ikipe y'igihugu ya Djibouti, yazakina imikino yo mu ijonjora rya Kabiri n’izava hagati ya Kenya na Sudani ikaba hagati ya tariki ya 20-22 na 27-29 Ukuboza 2024, naho imikino ya CHAN 2024 nyirizina yo ikazakinwa hagati ya tariki ya 1-28 za Gashyantare 2025 mu bihugu bya Tanzania, Kenya na Uganda.

Mbonyumwami Taiba yahamagawe mu mikino yo gushaka itike ya CHAN amaze gutsinda igitego 1 yaratanze imipira 3 yabivuyemo mu mikino 5 ya shampiyona yakinnye 

Mugisha Gilbert we amaze gukina umukino umwe wa shampiyona akaba nta gitego ndetse nta n'umupira ukivamo aratanga 

Iraguha Hadji amaze gukina imikino 5 akaba yaratsinzemo igitego 1 ndetse anatanga umupira umwe wakivuyemo