Umutoza wa Kaizer Chiefs yashimagije Ntwari Fiacre

Ku wa Gatandatu w'icyumweru gishize nibwo ikipe ya Kaizer Chiefs yanyagiraga ikipe ya Super Sport United F.C ibitego 4-0 mu ijonjora ry'ibanze ry'irushanwa rya Telkom Knockout.

Kuri uyu mukino,Ntwari Fiacre niwe wari mu izamu ukaba wari umukino we wa mbere asoje atinjijwe igitego mu mikino 4 amaze gukinira Kaizer Chiefs kuva yayigeramo mu mpeshyi y'uyu mwaka.

Nyuma y'uyu mukino umutoza w'iyi kipe ya Kaizer Chiefs,,Nasreddine Nabi yashimagije uyu munyezamu w'Amavubi avuga ko hari imipira iremereye yakuyemo yashoboraga no gutuma bishyurwa.

Yagize ati " Nibyiza, ni intsinzi nziza ariko nanone dukeneye gushimira Fiacre. Yakoze neza akuramo imipira iremereye yashoboraga gutuma abo duhanganye basubira mu mukino, ariko muri ibyo bihe bikomeye, yadutabaye mu buryo twari dukeneye.

Ariko na none, byari umurimo w'ikipe yose ndetse n'abakinnyi bose mu kibuga".

Ntwari Fiacre wamaze kuba umunyezamu wa mbere wa Kaizer Chiefs amaze kwinjizwa ibitego bine mu mikino ine amaze gukina.

Uyu mukinnyi yagiye muri iyi kipe yo ikina shampiyona y'icyikiro cya mbere muri Afurika y'Epfo mu mpeshyi y'umwaka ushize atanzweho arenga Miliyoni 400 z'Amafaranga y'u Rwanda avuye muri TS Galaxy nayo yo muri iki gihugu.

Ntwari Fiacre yashimagijwe n'umutoza we muri Kaizer Chiefs nyuma yo gusoza umukino atinjijwe igitego