EPL: Liverpool yatsinze Wolves ifata umwanya wa mbere

Wolves yakiriye Liverpool mu mukino w'umunsi wa Gatandatu wa Shampiyona y'u Bwongereza English Premier League 2024-25.
Ni umukino Liverpool yatangiye izi neza ko niwutsinda irara ku mwanya wa mbere,  kuko byatuma igira amanota 15, mu gihe Arsenal na Manchester City zo zifite 14.

Abakinnyi Wolves yabanje mu kibuga ni Johnstone, Semedo, Bueno, Toti, Ait-Nouri, Andre, J.Gomes, Lemina, Bellegarde, Cunha na Strand Larsen.

Abasimbura ba Wolves bari Jose Sa, Pond, R.Gomes, Doherty, Doyle, Sarabia, Forbs, Hwang na  Guedes.

Ikipe ya Liverpool, abakinnyi yabanje mu kibuga ni Alisson, Van Dijk, Konate, Diaz, Szoboszlai, Mac Allister, Salah, Jota, Robertson, Gravenberch na Alexander-Arnold.

Abasimbura ba Liverpool bari bari Kelleher, Gomez, Endo, Chiesa, Jones, Gakpo, Tsimikas, Quansah na  Bradley.

Ni umukino watangiye Wolves ica amarenga ko iza kwihagararaho nk'inkoko iri iwabo, gusa amashoti ya Strand Larsen yatangiranye, akagarurwa na ba myugariro ba Liverpool.

Liverpool nk'ikipe nkuru yaje kwinjira mu mukino ituje ku munota wa 45+2 ifungura amazamu ku gitego cya Ibrahima Konate ku mupira yahawe na Diego Jota.

Igitego cya Konate ni cyo cyatandukanyije amakipe yombi mu gice cya mbere. Mu gice cya kabiri, Wolves yagarukanye imbaraga zidasanzwe nuko ibona igitego cyo kwishyura cyatsinzwe na Rayan Ait-Nouri ku munota wa 56.

Ibyishimo bya Wolves ntabwo byamaze kabiri kuko ku munota wa 61, Liverpool yabonye penaliti yatewe neza na Mohammed Salah, nuko Liverpool itangira kuyobora umukino.

Abakinnyi ba Liverpool bagumye kwatakana imbaraga zidasanzwe ngo babone igitego cy'umutekano, igitego cya gatatu kiguma kubura, ari na ko Wolves yahigaga icya kabiri ariko nayo yakibuze. 

Umukino warinze urangira Liverpool iri imbere n'ibitego bibiri kuri kimwe cya Wolves, nuko ihita iyobora urutonde rwa shampiona y'u Bwongereza "English Premier League" n'amanota 15. 

Arsenal na Manchester City nizo zikurikiye Liverpool kuko zinganya amanota 14. 

Liverpool yatsinze Wolves ihita yegukana umwanya wa mbere 

Mohammed Salah yatsindiye Liverpool igitego cyayihaye intsinzi