Gen Mubarakh Muganga yasuye APR FC, Kapiteni wayo avuga ko Pyramids itazabatsinda

Gen. Mubarakh Muganga wabaye Chairman w'iyi kipe, gusa kuri ubu akaba ari Umuyobozi w'Icyubahiro yayisuye mu myitozo yo ku mugoroba wo kuri uyu wa Kane yakorewe muri Stade Amahoro. Nyuma y'iyi myitozo kapiteni w'iyi kipe y'Ingabo z'igihugu, Niyomugabo Claude, yavuze ko Umugaba Mukuru w’Ingabo z’u Rwanda yabahaye inama zikenewe. 

Ati: "Buri gihe iyo tugiye gukina umukino, iyo abonye umwanya kubera akazi aba afite kenshi hari igihe aza. Aba aduha inama, inama ze tuba tuzikeneye. Aba atubwira ko intego ari ugutsinda ni cyo kintu atubwira dushyira mu mutwe kandi natwe turabitekereza nk’abakinnyi ni akazi kacu, tukabishyirira mu bikorwa mu kibuga".

Yakomeje avuga ko Pyramids FC ari kipe nziza yabatsinze ubushize ariko ibya kera ari ibya kera. Ati: "Pyramids ni ikipe nziza koko yaradutsinze ariko ibya kera ni ibya kera iby'ubungubu ni iby'ubu. Turiteguye tuzashyiramo imbaraga zacu uko zingana zose. Badutsinda, hari abakinnyi batari barimo ariko hongewemo abandi bakinnyi bameze neza turiteguye ku wa Gatandatu".

Yavuze ko amakipe y'Abarabu ari amakipe meza ariko ko umupira wamenyekanye bagomba kujya gukina na Pyramids biteguye uburyo bwose. Ati: "Amakipe y’Abarabu ni amakipe meza. Aza inaha iwacu ukabona ntabwo ari mu mwuka wo gukina ariko iyo bageze iwabo birahinduka baba bateguye ahantu hose ariko natwe umupira waramenyekanye ni ukujya dukina nabo uburyo bwose baba bakoresha, yaba hehe natwe turiteguye ko natwe tuzitwara neza nk’ibisanzwe."

Niyomugabo Claude yasabye n'abafana kuzajya kubashyigikira. Ati: "Icyo nasaba abafana ba APR FC, ahantu hose umukunzi wayo ari ndamusaba ko aza kudushyigikira iyo tubona buzuye iyi Stade nziza biduha imbaraga zo gukora cyane. Nawe reba abantu buzuye iyi Stade gutaha bababaye natwe ntabwo tuba tubyifuza ni baze badushyigikire natwe dukore inshingano zacu".

Ikipe ya APR FC izacakirana na Pyramids mu mukino ubanza w'ijonjora rya Kabiri rya CAF Champions League kuri uyu wa Gatandatu Saa kumi n'ebyiri kuri Stade Amahoro.

Gen. Mubarakh Muganga yasuye APR FC mbere y'uko icakirana na Pyramids yo mu Misiri