Uwahoze ari Umuyobozi Mukuru wa YouTube yitabye Imana azize Kanseri

Nyuma y’imyaka ibiri ahanganye n’uburwayi bwa kanseri y’ibihaha, Susan Wojcicki yitabye Imana nk’uko byemejwe n’umugabo we, Dennis Troper wabitangaje mu ijoro ryo kuri uyu wa Gatanu tariki 9 Kanama 2024 abinyujije ku rubuga rwa Facebook.

Mu butumwa bwazamuye amarangamutima ya benshi, yagize ati: "Mbabajwe cyane no kubamenyesha inkuru Susan Wojcicki yitabye Imana. Umugore wanjye nkunda twari tumaranye imyaka 26 akaba na mama w’abana bacu batanu, yatuvuyemo uyu munsi nyuma y’imyaka 2 ahanganye na kanseri y’ibihaha.

Yakomeje avuga ko Susan atari inshuti ye magara gusa, ahubwo umufasha mwiza kuri we, akaba umubyeyi mwiza ku bana bari barabyaranye ndetse n’incuti ya benshi.

Ati: “Uruhare rwe ku muryango wacu ndetse no ku isi muri rusange rwari ntagereranwa. Imitima yacu irashavuye ariko twishimiye umwanya twamaranye na we.”

Ubu butumwa, yabusoje asaba abantu gukomeza kubazirikana muri ibi bihe by’akababaro ko kubura uwabo. Yabuherekesheje amwe mu mafoto agaragaza ibihe byiza bagiranye ndetse n’ay’abana babo.

Susan Wojcicki yatangaje ko agiye kuva mu nshingano zo kuyobora urubuga rwa YouTube akajya mu yindi mishinga ndetse akabona uko yita no ku muryango we, mu ntangiriro z’umwaka wa 2023.

Susan winjiye muri Alphabet mu myaka 26 ishize, yagize uruhare mu bikorwa bya sosiyete ya Google uhereye mu ntangiriro aho yabaye umuyobozi ushinzwe iyamamazabikorwa mu 1999.

Ni we wagiriye inama Google yo kugura YouTube mu 2006 bishyirwa mu bikorwa mu mwaka wakurikiyeho.

Mu myaka umunani yakurikiyeho, Wojcicki ni we wari Umuyobozi wa YouTube akaba umwe mu bagore bake bayoboye ibigo bitanga serivisi z’ikoranabuhanga.

Ku buyobozi bwe, YouTube yinjirije Google akayabo.