Yavukiye mu nkambi! Ibyo ukwiriye kumenya kuri Eduardo Camavinga wa Real Madrid

Ku itariki 10 Ugushyingo 2002 ni bwo Eduardo Camavinga yabonye izuba, avukira mu nkambi ya Cabinda iherereye mu ntara ya Cabinda muri Angola.

Camavinga yavukiye ku babyeyi bamwibarutse ubuzima bwabo ari ubw'ubuhunzi, cyane ko nabo bavukiye muri iyi nkambi ya Cabinda. Se yitwa Celestino Camavinga, naho Nyina ni Sofia Simao. 

Ubwo Camavinga yavukaga, se yari afite ubwenegihugu butatu, ubwa Portugal, Repubulika Iharanira Demokarasi ya Congo na Angola yavukiyemo, naho nyina ni Umunya Angola kavukire kuko ni ho ibisekuruza bye bikomoka. 

Muri 2003, Camavinga n'ababyeyi be bisanze mu Bufaransa, aho ubuzima n'ubundi butari bworoshye, gusa niho Eduardo Camavinga yakuriye anigira umupira w'amaguru. 

Imwe mu nkuru imuvugwaho ni uko yaba yaribarutse imfura ye afite imyaka 12 y'amavuko, gusa iyo nkuru byaje gusangwa ari igihuha yazamuye muri bagenzi be, ahubwo uwo yitaga umuhungu we ari murumuna we, mu bavandimwe batanu bavukana. 

Muri 2009, Eduardo Camavinga yatangiye umupira w'amaguru, awutangirira muri Drapeau-Fougères academy, aho yayikiniye kugera muri 2013. Kuva muri 2013 kugera muri 2018, Eduardo Celimi Camavinga, yari yaragiye muri Rennes y'abakiri bato. 

Mu mwaka w'imikino wa 2018-19, Camavinga wari ufite imyaka 16 y'amavuko, yatangiye kugirirwa icyizere cyo gukinira Rennes ya kabiri, aho yayikiniye imikino 13 ayitsindira ibitego bine.

Muri 2019, yatangiye gukinira Rennes nkuru, ayikinira kuva 2019 kugera 2021. Muri icyo gihe yayikiniye imikino 71, ayitsindira ibitego bibiri. Muri 2021, Real Madrid yarabutswe impano idasanzwe ya Camavinga, nuko imugura muri Rennes kuri Miliyoni 40£.

Kuva 2021 kugeza iki gihe, Celimi Camavinga Eduardo, amaze gukinira Real Madrid imikino 94, amaze kuyitsindira ibitego bibiri.

Muri 2019 Camavinga yahamagawe gufasha ikipe y'igihugu y'Ubufaransa mu batatengeje Imyaka 21, ayikinira imikino 13 ayitsindira ibitego bibiri. Mu ikipe nkuru y'igihugu y'u Bufaransa, Camavinga amaze kuyikinira imikino 18, yayitsindiye igitego kimwe.

Eduardo Camavinga yavukiye mu nkambi ariko ubu ni umukinnyi ibica bigacika

Impano ya Camavinga yagaragaye ubwo yakiniraga Rennes

Camavinga amaze kuba ucyogere mu ikipe y'igihugu y'u Bufaransa

Camavinga yabanje gukurura igihuha muri bagenzi be ko ubwo yari afite imyaka 12 y'amavuko yibarutse umuhungu, gusa byaje gutahurwa ko ari ibihuha ko uwo mwana ari umwe mu bavandimwe be