Jose Mourinho ari mu biganiro n'ikipe ikomeye ku mugabane w'iburayi

Umunya Portugal Jose Mourinho wamamaye atoza amakipe akomeye nka Real Madrid, Chelsea, Manchester United, kuva muri Mutarama nta kazi yari afite nyuma y'uko yirukanwe muri AS Roma agasimburwa na Danielle De Rossi.

Amakuru dukesha Ikinyamakuru One Football, avuga ko Jose Mourinho yiteguye kugaruka mu kazi ko gutoza, nyuma y'uko ibiganiro bigeze kure hagati ye na Fenerbahce yo muri Turkey.

Nubwo mu myaka ya nyuma ya Jose Mourinho atakiramba mu makipe aba ari gutoza, azwiho umwihariko wo gutwara igikombe muri buri kipe yose atoje. 

Uretse Tottenham Hotspur Jose Mourinho atahaye igikombe, ayandi makipe yose yatoje yagiye agira ibikombe ayahesha, kabone nubwo yaba ari mu bihe bibi.

Akigera muri AS Roma, Jose Mourinho yayifashije kwegukana UEFA Conference League, muri 2022, naho muri 2023 ayigeza ku mukino wa nyuma wa Europa League.

Ikinyamakuru cyo muri Portugal kwitwa A Bola, cyatangaje ko ibiganiro hagati ya Mourinho na Fenerbahce, byatangiye, yewe ngo ubu Jose Mourinho ari kubarizwa Istanbul muri Turkey.

Biteganyijwe ko Jose Mourinho naramuka yumvikanye na Fenerbahce, azahita yasimbura Ismail Kartal uzahabwa inshingano nsha mu ikipe ya Fenerbahce.

Muri Fenerbahce, Jose Mourinho azaba arikumwe n'abakinnyi nka Fred wamenyekanye muri Manchester United, Edin Dzeko wamamaye muri Manchester City, Dusan Tadic, na Michy Batshuay.

Jose Mourinho kandi azajya atoreza kuri Şükrü Saracoğlu stadium, ikibuga cya Fener bahce.

Jose Mourinho uherutse kwirukanwa na AS Roma ari mu biganiro na Fenerbahce yo muri Turkey