AFCON: Morocco yatsinze Tanzania, naho DRC igwa miswi na Zambia

Umukino wa Morocco na Tanzania wabereye kuri Stade Laurent Pokou. Waranzwe no kwiharira umupira ku ruhande rwa Morocco, Tanzania yo igaragaza intege nke

Ikipe y'igihugu ya Morocco, yamanutse mu kibuga Ifite intwaro zayo zose, harimo Achraf Hakimi, Youssef En-Nesyri, Sofyan Amrabat, Hakim Ziyech ndetse n'abandi.

Morocco yafunguye amazamu ku munota wa 30, ku gitego cya Romain Saiss. 

Tanzania ikimara kurya igitego cya mbere, abasore bayo bagerageje gushaka ko bakwishyura bakajya kuruhuka banganya, biba iby'ubusa. Igice cya mbere cyarangiye ari igitego kimwe cya Morocco ku kusa bwa Tanzania.

Mu gice cya Kabiri, Morocco yimye Tanzania umwanya wo kwitekerezaho, iyongera ibindi bitego bibiri, ndetse Tanzania irya ikarita itukura.

Ku munota wa 77 nibwo Azzedine Ounahi yaboneye Morocco igitego cya Kabiri, naho Youssef En-Nesyri atsinda icya gatatu ku munota wa 80. 

Ubwo Tanzania yari imaze kurya ibitego bitatu, abakinnyi bayo barimo Ally Samatta, Charles M'Mombwa, Mohamed Husseini, Haji Mnoga na Himid Mao, bahize igitego cy'impozamarira, nuko barakibura.

Umukino warangiye abasore ba Morocco ari bo bacyuye intsinzi ku bitego bitatu ku busa bwa Tanzania.

Mu mukino wayo wa mbere, Ikipe y'igihugu ya Morocco yatsinze Tanzania ibitego bitatu ku busa 

DRC yaguye miswi na Zambia

Repubulika Iharanira Demokarasi ya Congo na Zambia, zibarizwa mu itsinda rya F. Ni ibihugu byombi  byamanutse mu kibuga bizi uburyohe bw'iki gikombe, dore ko buri kipe igifite inshuro imwe.

Zambia, yafunguye amazamu ku munota wa 23, ku gitego cyatsinzwe na Kings Kangwa. 

Zambia ikimara gutsinda igitego, byasabye iminota itatu ngo DRC yishyure. Yoane Wissa niwe wishyuriye Congo ku munota wa 27.

Igice cya mbere, cyarangiye amakipe yombi anganya igitego kimwe kuri kimwe.

Mu gice cya Kabiri, Abakinnyi ba DRC barimo Bakambu, Theo Bongonda, Charles Pickel, Silas na Mechak Elia winjiye asimbuye, bagumye gushaka igitego cya kabiri, birangira kubuze.

Ubwo DRC yashakaga igitego cya Kabiri, na Zambia ntabwo yari ituje, kuko Abakinnyi nka Emmanuel Banda, Fashion Sakala, Patson Daka na Rodrick Kabwe, bashakiye Zambia igitego cya Kabiri, nabo biranga.

Umukino warangiye amakipe yombi anganya igitego kimwe kuri kimwe. Kunganya uyu mukino, byatumye Morocco ariyo iba iya mbere mu itsinda, ubwo ifite amanota atatu, naho Tanzania yo ni iya nyuma kuko yatsinzwe na Morocco. Zambia na DRC, zo ziranganya inota rimwe.

Repubulika Iharanira Demokarasi ya Congo, yaguye miswi na Zambia