U Rwanda rugiye kwakira imikino y'amashuri ya FEASSA nyuma y'imyaka 5

Mu ijoro ryo kuri uyu wa Mbere tariki 13 Gashyantare 2023, nibwo ishyirahamwe ry'imikino mu mashuri FRSS ryashyize hanze itangazo rigaragaza ko bazakira imikino ya FEASSA ikunze kugaragaramo impano zitandukanye mu mikino inyuranye.

Iyi mikino ihuza ibigo by'amashuri mu karere u Rwanda ruherereyemo, iba ngaruka mwaka ndetse ikitabirwa n'ibigo byitwaye neza mu bihugu byabo mu mikino itandukanye.

U Rwanda rugiye kongera kwakira iyi mikino nyuma y'iyabereye i Musanze mu 2018. Umwaka ushize, iyi mikino yabereye mu gihugu cya Tanzania u Rwanda rukaba rwaritwaye neza mu mikino ya Handball.

U Rwanda rwemejwe nk'uruzakira iyi mikino, nyuma yaho mu cyumweru gishize habaye amatora y'umuyobozi mushya wa Federasiyo y'imikino mu mashuri (FRSS), aho Karemangingo Luke ariwe watowe.

Karemangingo yatowe ku majwi 34 kuri 35 yatoraga. Jean d'Amour Majyambere usanzwe ari umuyobozi w'ishuri rya Ecole Ste Berndette de Kamonyi atorwa nka Perezida wungirije. Ernest Sibomana usanzwe ari umuyobozi w'ishuri rya ES Kiyanza, yatorewe kuba Perezida wa kabiri wungirije.

Mu kiganiro cye cya mbere n'itangazamakuru, Karemangingo yatangaje ko yishimiye inshingano ahawe ndetse yemeza ko asanzwe abikora ahubwo ubu agiye kurushaho.

Yagize ati "Nishimiye inshingano mpawe, kuko n'ubusanzwe nk'umurezi biri mu nshingano zanjye. Icyo nsezeranya abanyeshuri, ababyeyi n'igihugu, ni uko nzakora inshingano zanjye neza, cyane cyane tugamije ko siporo igira imbaraga zidasanzwe."

Karemangingo abajijwe kucyo agiye gukora byihutirwa, yavuze ko agiye kongera imbaraga ku gushaka impano z'abana bakiri bato.

"Tugiye gukora akazi ku rwego rw'igihugu, dushake abana bafite impano, ndetse kuburyo hazaba hari uburyo bworoshye bwo kubageraho. Tugomba gushaka ibibuga abana bakiniraho, kuko ntiwashaka umusaruro mu bana badafite aho gukinira."

Iyi mikino imara iminsi icumi, izatangira tariki 17 kugera 27 Kanama 2023

Iyi mikino yitabirwa n'ibihugu birimo; u Rwanda u Burundi, Kenya, Tanzania, Uganda, na Sudan Y'Epfo

Karemangingo aherutse gutangaza ko agiye gushyira imbaraga mu kuzamura imikino yo mu mashuri