Sizzla yakije umuriro kuri DJ Khaled amushinja kugira ibikinisho abahanzi ba Jamaica

Mu butumwa yanyujije kuri Instagram, uyu munyabigwi yashinje Dj Khaled kumusuzugura hamwe n’abandi bahanzi bo muri Jamaica.

Atwika iki cyemezo yari yagenewe na Dj Khaled kubw’uruhare yagize bw’umuziki we by’umwihariko kuri Album yitwa ‘Father Asahd’, yanavuze ko nta foto yariho n’izina ritagaragaraga neza nk’uko byagakwiye.

Mu minsi ishize kandi Dj Khaled aheruka kumurika indi Album yise ‘God Did’, nayo yafashijwemo n’abahanzi bo muri Jamaica nka Sizzla, Buju, Banton, Capleton na Bounty Killer.

Kuri iyi Album indirimbo yakoranye n’abo muri Jamaica zagize igikundiro cyo hejuru, ariko kuri Sizzla asanga Dj Khaled ibyo atabiha agaciro uko bikwiye.

Avuga ko Dj Khaled yagiye yungukira mu muco n’umuziki wa Jamaica ariko akituriza ntashake kubyerekana, byatumye anatwika impano yari yamugeneye.

Dj Khaled ari mu bagabo bafite izina rikomeye mu muziki ku isi, azwiho guhuza abahanzi mu ndirimbo no gukorana nabo indirimbo zitandukanye kandi zigira igikundiro cyo hejuru.

Miguel Orlando Collins na we uzwi nka Sizzla Kalonji, ni umuhanzi wamamaye mu njyana ya Reggae uri mu bakomeje guhuza iyi njyana n’isi y’umuziki wa none.

Sizzla yavuze ko izina ryanditse mu buryo butagaragara, kandi nta n’ifoto yashyizwe ku cyemezo cy'ishimwe yagenewe na DJ Khaled

Yagishwanyaguje arangije aragitwika 

DJ Khaled na Sizzla bagiye bakora ku mishinga myinshi mu bihe bitandukanye