Yakanyujijeho na Chris Brown: Ibyo wamenya kuri Juliana Nalu watwaye umutima Kanye

Hashize iminsi bimenyekanye ko umuherwe w'umuraperi kabuhariwe Kanye West ari mu munyenga w'urukundo n'umukobwa w'uburanga, witwa Juliana Nalu arusha imyaka 21. 

Izina Juliana Nalu rikomeje kugarukwaho ku mbuga nkoranyambaga ndetse no mu binyamakuru byinshi by'imyidagaduro, hibazwa byinshi kuri iyi nkumi iri guhabwa amahirwe yo gusimbura Kim Kardashian mu buzima bwa Ye. 

Ese Juliana Nalu ni muntu ki? akomoka he? yamenyekanye ate? Ibi bibazo n'ibindi bimwerekeyeho nibyo ugiye gusobanukirwa muri iyi nkuru, unamenye byinshi ku mubano we na Chris Brown bakanyujijeho.

Juliana Nalu ni muntu ki?

Juliana Nalu ni umukobwa w'imyaka 24 y'amavuko, wavukiye mu mujyi wa Rio De Janeiro mu gihugu cya Brazil. Yagiye kuba muri Leta Zunze Ubumwe za Amerika afite imyaka 19 y'amavuko, aho yagiye gukurikirana inzozi ze zo kuba umunyamideli. Juliana Nalu ni umwana wa gatatu mu bana batanu bo mu muryango wabo.

Uko Juliana Nalu yamenyekanye

Mu 2019 nibwo Juliana Nalu yatangiye kumenyekana mu ruhando rw'imideli, ubwo yagaragaye mu mashusho yamamariza ibirungo by'Ubwiza (Make Up) by'uruganda rwa L'Oreal Paris na Maybelline. Kuva ubwo Juliana Nalu yatangiye no kwamamariza inzu z'imideli zikomeye zirimo nka Gucci na Fendi, bituma ashyirwa ku rutonde rw'abanyamidelikazi bagezweho mu 2021 na Vogue Magazine.

Juliana Nalu ku mbuga nkoranyambaga

Imbuga nkoranyambaga zagize uruhare mu kuzamura umunyamideli Juliana Nalu. Kuri Instagram akurikirwa n'abantu ibihumbi magana atanu na mirongo ine na bitandatu (546.000). Juliana Nalu akunze kwerekana ibikorwa bye abicishije ku mbuga nkoranyambaga.

Urukundo rwe na Kanye West umurusha imyaka 21

Mu ntangiriro z'ukwezi kwa cumi nibwo byatangiye kuvugwa ko umuraperi Kanye West w'imyaka 45 yaba ari mu rukundo na Juliana Nalu, nyuma y’aho bagaragaye bahuza urugwiro mu birori bya Paris Fashion Week 2022. Mu mpera z'icyumweru gishize, nibwo Kanye West yemeje ko umukunzi we mushya ari Juliana Nalu. Amafoto yabo basohokanye akomeje guca ibintu ku mbuga nkoranyambaga.

Umubano wa Juliana Nalu na Chris Brown

US Magazine yatangaje ko Juliana Nalu atari ubwa mbere akundanye n'icyamamare, dore ko yigeze kukanyuzaho na Chris Brown n’ubwo ibyabo bitamaze kabiri. Urukundo rwa Juliana na Chris rwatangiye mu mpera z'umwaka wa 2021, gusa ruza kurangira ubwo byamenyekanaga ko Chris Brown yateye inda undi munyamidelikazi witwa Diamond Brown baherutse kwibarukana umwana w'umuhungu. 

Kugeza ubu Juliana Nalu yongeye kugarukwaho cyane nyuma y’aho iby'urukundo rwe na Kanye West bigiriye ku mugaragaro.