Buravan, Chriss Eazy na Bwiza bayoboye abandi mu matora ya Kiss Summer Awards 2022

Aya matora ari kubera ku rubuga rwa interineti rwa noneho.events.com no kuri telefone (USSD).

Azashingirwaho mu gutanga ibihembo kuri aba banyamuziki na ba Producer, bagize uruhare rukomeye mu gususurutsa abanyarwanda muri iyi mpeshyi y’uyu mwaka w2022.

Kuva mu 2018, Kiss Fm yatanze ibi bihembo binyuze mu kiganiro cyo kuri Radio, bihinduka mu mwaka wa 2021 ubwo byatangirwaga mu nyubako y’imyidagaduro ya Bk Arena.

Muri ibi bihembo hahembwa icyiciro cy’indirimbo y’impeshyi (Best Summer Song), icyiciro cya Producer w’impeshyi (Best Summer Producer), icyiciro cy’umuhanzi wakoze neza kurusha abandi muri [iyi] mpeshyi (Best Summer Artist) n’icyiciro cy’umuhanzi mushya wigaragaje (Best New Summer Artist).

Ni ku nshuro ya Gatanu ibi bihembo bigiye gutangwa. Bitegurwa hagamijwe gushimira abaririmbyi na ba ‘Producer’ ku kazi katoroshye baba barakoze mu rugendo rw’umuziki, no kubereka ko Kiss Fm izirikana imirimo yabo.

Mu gihe cy’iminsi itanu ishize aya matora ari kuba, Chris Eazy ni we uyoboye abandi mu majwi mu cyiciro 'Best Song' abicyesha indirimbo 'Nina' aho afite amajwi 119. Ari imbere kandi mu majwi mu cyiciro 'Best Male Artist' aho afite amajwi 157.

Umuhanzikazi Bwiza wo muri Kikac Music Label, ayoboye abandi nawe mu byiciro bibiri. Uyu mwari afite amajwi 64 mu cyiciro ‘Best New Artist’ akagira n’amajwi 153 mu cyiciro ‘Best Female Artist’.

Mu cyiciro cya 'Best Producer', Santana Sauce wo muri Hi5 ni we ufite amajwi, aho agejeje 262. Ni mu gihe Album 'Twaje' ya Buravan uherutse kwitaba Imana ari yo iyoboye izindi mu cyiciro 'Best Album' aho ifite amajwi 438.

Amajwi arakomeza guhinduka bitewe n’ukuntu abafana b’umuziki bakomeza gushyigikira aba Producer ndetse n’abahanzi, bahatanye muri ibi bihembo.

Gutora ukoresheje telefone (USSD) ni *559*60# ugakurikizaho kode y’uwo utoye. Cyangwa se ugaca kuri www.inyarwanda.com cyangwa www.noneho.events.com

Abegukanye ibihembo Kiss Summer Awards mu mwaka wa 2021:

Confy yegukanye igihembo cy’umuhanzi mushya w’impeshyi (Best New Summer Artist). Uyu muhanzi wakunzwe mu ndirimbo zirimo ‘Joanna’ yashimye Imana, ashima abafana be n’abakunzi b’umuziki muri rusange.

Igihembo cye yagituye umubyeyi we wari mu bitabiriye ibirori byo gutanga ibi bihembo, ashima Kiss Fm itegura ibi bihembo.

Bruce Melodie yegukanye igihembo cy’umuhanzi w’impeshyi w’umwaka wa 2021 (Best Summer Artist). Iki gihembo yagishyikirijwe n’umuyobozi mu ruganda rwa Skol rwateye inkunga ibi bihembo ku nshuro ya kane.

Uyu muhanzi yavuze ko afite ishimwe ku mutima, ashima Imana, abafana n’abakunzi b’umuziki bamushyigikiye kuva ku munsi wa mbere.

Yashimye ‘abantu bose bamukunda, n’Imana yamuhaye impano idasanzwe mu muziki. Yashimye ikipe bakorana mu kazi ka buri munsi, ashima Juno Kizigenza yarebereye inyungu.

Ngabo Medard Jorbert [Meddy] yegukanye igihembo cy’indirimbo y’impeshyi y’umwaka (Best Summer Song of the year)- (My Vow).

Umuraperi Tuyishime Joshua wamamaye nka Jay Polly, witabye Imana, yahawe igihembo cyiswe ‘Best Life Achievement Awards’.

Producer Element wo muri Contury Records ni we wegukanye igihembo cya Producer w’impeshyi (Best Summer Producer).

Chriss Eazy ayoboye abandi mu cyiciro cya Best Artist. Indirimbo ye ‘Inana’ iyoboye mu cyiciro cy’indirimbo nziza 

Bwiza arayoboye mu cyiciro cy’abahanzikazi (Best Female) no mu cyiciro cya Best New Artist