Jack Wilshere wasoje umupira w’amaguru imburagihe yahawe akazi muri Arsenal

Wilshere aherutse gutangaza ko asezeye ku mupira w’amaguru nk’umukinnyi wabigize umwuga, nyuma yo kumara igihe yaribasiwe n’imvune.

Benshi mubo bakinanye muri Arsenal barimo Thierry Henry, Ozil n’abandi bababajwe n’iyi nkuru kuko babonaga agifite byinshi byo gutanga mu kibuga ariko bavuga ko nta kundi ari ubuzima.

Nyuma yuko Wilshere atangaje ko asezeye gukina umupira w’amaguru nk’uwabigize umwuga, ikipe ya Arsenal yakiniye imyaka irenga 10 yahaye agaciro ibyo yayikoreye byose imuha akazi ko gutoza ingimbi zayo.

Ikipe ya Arsenal Wilshere yabayemo imyaka 17 yatangaje ko ubu yagizwe umutoza w'ikipe y'abatarengeje imyaka 18.

Jack Andrew Garry Wilshere wamenyekanye nka Jack Wilshere yabaye muri Arsenal y’abato guhera mu 2001 kugeza mu 2008, aza kuzamurwa mu ikipe nkuru yakiniye kuva muri uwo mwaka kugeza mu 2018, bivuze ko yayikiniye imyaka 10 mbere yo kwerekeza muri West Ham United yamazemo imyaka ibiri, yerekeza muri AFC Bournemouth ayikinira umwaka umwe, nayo ayivamo yerekeza muri       AGF yo muri Danemark yakiniye imikino 14 abona gusezera burundu ku mupira w’amaguru.

Mu myaka 10 Wilshere yakiniye ikipe nkuru ya Arsenal, yakinnye imikino 197 mu marushanwa atandukanye ayitsindira ibitego 14. Uyu mukinnyi wari inking ya mwamba mu kibuga hagati, yafashije Arsenal kwegukana ibikombe 3 bikomeye birimo FA Cup ebyiri na Community Shield imwe.

Wilshere wakiniye Arsenal nkuru imyaka 10 yahawe akazi nyuma yo gusoza umupira w'amaguru imburagihe

Jack Wilshere ni umwe mu bakinnyi bagize ibihe byiza muri Arsenal