BREAKING: Irushanwa rya Miss Rwanda ryahagaritswe

Kuri uyu wa Mbere tariki 9 Gicurasi 2022, Minisiteri y’Urubyiruko n'Umuco yasohoye itangazo ryashyizweho umukono na Minisitiri Rosemary Mbabazi, rimenyesha Abanyarwanda ko irushanwa rya Miss Rwanda ribaye rihagaritswe.

Iri tangazo rigiri riti “Hashingiwe ku iperereza ririmo gukorwa n’Urwego rw’Igihugu rushinzwe ubugenzacyaha (RIB), ku muyobozi wa “Rwanda Inspiration BackUp”, ukekwaho ibyaha bifitanye isano n’ihohoterwa rishingiye ku gitsina yakoreye abakobwa bitabiriye irushanwa rya “Miss Rwanda” mu bihe bitandukanye;

Minisiteri y’Urubyiruko n’Umuco iramenyesha Abanyarwanda ko ibaye ihagaritse iri rushanwa mu gihe iperereza ritararangira.”

Kuwa Gatatu tariki 4 Gicurasi 2022, ni bwo Urwego rw’Igihugu rw’Ubugenzacyaha (RIB) rwohereje mu Bushinjacyaha dosiye ya Ishimwe Dieudonné [Prince Kid].

Icyo gihe, Umuvugizi w’Urwego rw’Igihugu rw’Ubugenzacyaha (RIB), Dr Murangira Thierry yabwiye INYARWANDA ko iperereza ry’ibanze ryagaragaje ibyaha bitatu (3) Ishimwe Dieudonné [Prince Kid] akurikiranyweho. Ibyo byaha ni: 

1. Gukoresha imibonano mpuzabitsina ku gahato (rape) gihanishwa igihano cy’igifungo kiri hagati ya 10-15 hakiyongeraho n’Ihazabu y’amafaranga ari hagati ya 1-2M (1,000,000 Frw - 2,000,000 Frw).

2. Gusaba cyangwa gukora ishimishamubiri rishingiye ku gitsina (gihanishwa igihano cy’igifungo kiri hagati ya 5-7), hakiyongeraho n’Ihazabu y’amafaranga ari hagati ya miliyoni 1-2 Frw.

3. Guhoza undi ku nkeke bifitanye isano n’imibonano mpuzabitsina (gihanishwa igihano cy’igifungo kiri hagati ya 1-2, hakiyongeraho n’Ihazabu y’amafaranga ari hagati ya 100,000 Frw -200,000 Frw).

Akekwa kuba yarabikoze mu bihe bitandukanye, abikorera bamwe mu bagiye bitabira irushanwa rya Miss Rwanda mu bihe bitandukanye.

‘Prince Kid’ yafunzwe ku wa 25 Mata 2022 akurikiranyweho ibyaha bifitanye isano n’ihohoterwa rishingiye ku gitsina yakoreye abakobwa bitabiriye Miss Rwanda mu bihe bitandukanye.

Prince Kid wateguraga Miss Rwanda akurikiranyweho ibyaha birimo ihohoterwa rishingiye ku gitsina yakoreye abakobwa bitabiriye iri rushanwa

Nshuti Muheto Divine ni we Miss Rwanda uheruka gutorwa muri uyu mwaka wa 2022