Ikipe ya Arsenal yatsinze Tottenham Hotspur bigoranye ibitego 2-1 mu mukino wo ku munsi wa 21 wa shampiyona y'icyiciro cya mbere mu Bwongereza, itangira guhumekera mu bitugu bya Liverpool iri kumwanya wa mbere.
Ni mu mukino wakinwe kuri uyu Wa Gatatu Saa yine z'ijoro kuri Emirates Stadium.
Umukino watangiye ikipe ya Arsenal isatira cyane ishakauko yafungura amazamu hakirikare ndetse hari naho byashobokaga ku mupira Thomas Partey yarahaye Rahim Sterling gusa umunyezamu wa Tottenham Hotspur,Antonin Kinsky asohoka neza aratabara.
Arsenal yakomeje kwiharira umupira cyane arinako isatira dore ko yari yaciye umurongo ntarengwa ariko ba myugariro ba Tottenham Hotspur bakomeza kwirwanaho.
Ku munota wa 19 Tottenham Hotspur yabonye uburyo bwa mbere imbere y'izamu ku mupira Djed Spence yari ahinduye usanga Dominic Solanke arekura ishoti ariko David Raya aratabara ashyira umupira muri koroneri.
Bidatinze ku munota wa 25 Heung Min Son yafunguye amazamu ku mupira wamusanze ahagaze inyuma y'urubuga rw'amahina arekura ishoti ukubita ku maguru ya William Saliba uragenda unyeganyeza inshundura.
Nyuma yo gutsindwa ikipe ya Arsenal yasatiriye cyane ishaka uko yakwishyura maze iza kubigeraho ku munota wa 40 Leandro Trossard atera koroneri maze iragenda isanga Gabriel Maghalhaes ashyiraho umutwe bituma Dominic Solanke yitsinda.
Iyi kipe yakomeje kwatsa umuriro imbere y'izamu maze mbere yuko igice cya mbere kirangira ihita ibona igitego cya 2 gitsinzwe na Leandro Trossard.
Mu gice cya kabiri Tottenham Hotspur yaje ikora impinduka mu kibuga havamo Pape Matar Sarr na Yves Bissouma hajyamo Brendan Johnson na James Maddison.
Nubwo Tottenham Hotspur yakoze impinduka ariko Arsenal yakomeje gusatira ndetse abarimo Rahim Sterling bakarata uburyo bwashoboraga kuvamo igitego cya 3.
Mu minota ya nyuma y'umukino Tottenham Hotspur nayo yasatiriye cyane ishaka uko yakwishyura ariko David Raya aba ibamba aho yakuragamo imipira iremereye. Umukino warangiye Arsenal itsinze Tottenham Hotspur ibitego 2-1.
Ikipe y'Abarashi yahise ijya kumwanya wa kabiri n'amanota 43 iguhemekera mu bitugu bya Liverpool iri kumwanya wa mbere n'amanota 47.
Indi mikino yabaye Newcastle United yatsinze Wolves 3-0,Aston Villa itsinda Everton 1-0 naho Crystal Palace itsinda Leicester City 2-0.
Arsenal yatsinze Tottenham Hotspur bigoranye
Leandro Trossard yishimira igitego yatsinze
Eng
RSS 
TANGA IGITECYEREZO