Rafael wa AC Milan yakuyeho agahigo kari kamaze imyaka 19 yandika amateka mashya muri shampiyona y'u Butaliyani

Kuri iki cyumweru tariki ya 20 Ukuboza 2020, mu Butaliyani bakinaga umunsi wa 13 wa shampiyona, aho AC Milan iyoboye urutonde rwa shampiyona yari yasuye Sassuolo ku kibuga cyayo, inayihatsindira ibitego 2-1.

Muri uyu mukino umunya-Portugal w'imyaka 21 y'amavuko, Rafael Leão, yatsinze igitego cya mbere cya AC Milan ku isegonda rya gatandatu ku mupira yahawe neza na  Hakan Calhanoglu, ahita aba umukinnyi wa mbere mu mateka ya shampiyona y'u Butaliyani utsinze igitego cyihuse.

Ku munota wa 26, Alexis Saelemaekers yatsinze igitego cya kabiri cya AC Milan cyatumye iyobora iminota 45 y'igice cya mbere ariko mu gice cya kabiri umukino ugana ku musozo ku munota wa 89, Domenico Berardi yatsinze igitego cy'impozamarira ku ruhande rwa Sassuolo.

Gutsinda uyu mukino byatumye AC Milan ikomeza kwicara ku mwanya wa mbere muri Seri A y'u Butaliyani n'amanota 31 mu mikino 13, ikaba irusha inota rimwe gusa Inter Milan ya kabiri, mu gihe Juventus ya gatatu n'amanota 27.

Rafael Leão yakuyeho agahigo kari kamaze imyaka 19, ka Paolo Poggi wakiniraga Piacenza, aho mu 2001 yatsinze igitego ku isegonda rya munani. Kuva icyo gihe imyaka yari yihiritse ari 19 nta mukinnyi urakuraho ako gahigo muri shampiyona y'u Butaliyani.

Rafael yatsinze igitego cyihuse mu mateka ya shampiyona y'u Butaliyani

Rafael yanditse amateka akomeye muri shampiyona y'u Butaliyani