RFL
Kigali

Umutoza Etienne Ndayiragije wa Tanzania mu mazi abira nyuma y'ijambo rya Perezida Magufuli

Yanditswe na: SAFARI Garcon
Taliki:14/10/2020 12:48
0


Umurundi utoza ikipe y'igihugu ya Tanzania, Etienne Ndayiragije, ari ku gitutu gishobora no kumwirukanisha ku kazi ke, nyuma y'ijambo rya Perezida Pombe Magufuli wa Tanzania, wavuze ko atiyumvisha uburyo Tanzania ituwe na Miliyoni 55, itsindwa n'igihugu nk'u Burundi.



Ku Cyumweru tariki ya 11 Ukwakira 2020, kuri Stade Uwanja wa Mkapa i Dar es Salaam, ikipe y'igihugu ya Tanzania yahatsindiwe n'u Burundi igitego 1-0 mu mukino wa gicuti, cyatsinzwe na Saido Ntibazonkiza.

Ntabwo abafana b'ikipe ya Taifa Stars ya Tanzania bishimiye umusaruro bakuye ku ikipe y'igihugu y'u Burundi, gusa byabaye bibi cyane kuri uyu mutoza nyuma yuko Petrezida w'iki gihugu agaragaje akababaro ko gutsindwa n'u Burundi atangaza ko kugeza magingo aya atarabyiyumvisha neza.

Mu gitondo cyo ku wa Mbere ubwo Perezida Magufuli yari kuri Stade yo mu gace ka Kinyerezi, mu bikorwa kwiyamamaza nk’umukandida uzahagararira ishyaka Chama Cha Mapenduzi (CCM), yavuze ko bitumvikana kuba ikipe ya Tanzania yatsindwa n’u Burundi butuwe na miliyoni ebyiri z’abaturage (gusa u Burundi butuwe n’abakabakaba miliyoni 12).

Yagize ati "Igihugu nka Tanzania gifite umubare w’abantu miliyoni 55, mwatsinzwe n’ikipe y’igihugu gifite abantu miliyoni ebyiri. Ndashaka mumbwize ukuri. Mu bantu miliyoni 55 twabuze abakinnyi 11 bagomba guhagararira iki gihugu muri uyu mukino w’ingirakamaro ukunzwe ku Isi"?

Ubu burakari bwa Perezida Magufuli bushobora gusiga Etienne ahambirijwe muri iyi kipe cyangwa agatangira kubarirwa imikino ku buryo isaha n'isaha yakongera gukora ikosa ryo gutsindwa undi mukino ashobora kwirukanwa.

Taifa Stars ya Tanzania iri kwitegura imikino ibiri izakina na Tunisia mu kwezi gutaha mu mikino yo mu matsinda yo gushaka itike y'igikombe cya Afurika CAN 2021 kizabera muri Cameroun.

Perezida Magufuli yatangaje ko atariyumvisha uburyo Tanzania ituwe na miliyoni 55, itsindwa n'u Burundi

Umutoza Etienne ashobora gusezererwa n'ikipe y'igihugu ya Tanzania







TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND