G.S Sainte Bernadette de Save ni yo yareze imfura mu bakobwa b’abanyarwandakazi bakandagiye mu ishuri- TWAYISUYE

Cyera ubwo abazungu bazaga mu Rwanda, uburezi ntibwatangiye ku bana b’ibitsina byombi kuko mu mashuri yisumbuye habashaga kujyamo abahungu gusa naho abakobwa bakagarukira mu mashuri abanza. Ibi byateye amatsiko INYARWANDA, duhitamo kwigerera kuri iki kigo cyabaye intangiriro y’uburezi ku mwana w’umukobwa. Abahize bahita ku 'ISOKO ISUMA UBWENGE'. 

Iyo ukigera muri iki kigo, usanga ibintu byose bituje ndetse nta muntu ucaracara kuko abanyeshuri baba bari mu ishuri, ushinzwe kwakira abashyitsi aba ari mu biro hafi y’amarembo manini abantu bose binjiriramo nuko akagufasha kubona ikikugenza. Ubwo twageragayo, twakiriwe n’umuyobozi w’iki kigo Soeur Mukandoli Immaculée.

Soeur Mukandoli Immaculée, umuyobozi wa Groupe Scolaire Sainte Bernadette de Save

Mu ncamake uyu muyobozi yaduhaye, Groupe Scolaire Sainte Bernadette Save yatangiye muri 1938, iba ikigo cya mbere gitanga uburezi ku bakobwa, gitangizwa n’ababikira bera b’Umwamikazi wa Afurika (Soeurs Notre Dame D’Afrique). Ryatangiye ari ishuri ry’inderabarezi (Ecole normale) ritangirana n’abanyeshuri 21, harangiza 18 muri bo, barangizaga bafite D3, bigenda bikura. Mu 1976 iri shuri ryaje guhindura izina ryitwa Groupe Scolaire Save Filles kugeza mu 1992.

Mu mwaka wa 1992 nibwo iri shuri ryaje kwemera n’abanyeshuri b’abahungu niko guhita rihindura izina mu 1993 ryitwa Groupe Scolaire Sainte Bernadette kugeza ubu. Ubu iki kigo kiyoborwa n’ababikira bo mu muryango wa Benebikira. Iri shuri ryagiye rigira amashami menshi atandukanye, arimo  Inderabarezi, indimi, ubunyamabanga, Ubukungu, Ubumenyamuntu, Imibare n’ubugenge, Ibinyabuzima n’ubutabire. Kugeza ubu hari aya mashami:

Icyiciro rusange (Ordinary Level)

MEG (Mathematics-Economy-Geography), Imibare, Ubukungu, Ubumenyi bw’isi

HEL (History-Economy-Literature) Amateka, Ubukungu, Ubuvanganzo

PCM ( Physics-Chemistry-Mathematics) Ubugenge, Ubutabire, Imibare

MCB (Mathematics-Chemistry-Biology) Imibare, Ubutabire, Ibinyabuzima.

Uko imyaka yagiye itanbuka niko iki kigo cyagiye gihindura ibintu bimwe na bimwe mu rwego rwo gukomeza gutanga uburezi bujyanye n’igihe. Muri iyi minsi ya none iki kigo kiri gushishikariza abana b’abakobwa gukunda ‘Sciences’, dore ko n’ubwo abana bose bahawe amahirwe angana mu mashuri ariko hari abagitinya bakumva ko ‘Sciences’ ari iz’abahungu, gusa ngo muri Sainte Bernadette umuyobozi abona abanyeshuri be b’abakobwa bakunda ‘sciences’ kuko hari n’abuzuza ibizamini bya leta benshi.

Iki kigo kibarurwa mu bigo bya kiliziya gatolika bifashwa na leta. Soeur Mukandoli Immaculée umaze imyaka irenga 10 ayobora iki kigo avuga ko ikintu cya mbere kimushimisha mu myaka amaze ayobora iki kigo ari ukurera abana ukabona uko bakura mu bwenge, mu gihagararo no kuri roho ndetse ngo abenshi bavuye muri Groupe Scolaire Sainte Bernadette de Save bahagaze neza hanze aha ndetse uhavuye aho umushyize hose arangiza inshingano ze neza.

Soeur Mukandoli Immaculée avuga ko kurera abana ari umurimo ushimisha kuko utanga imbuto zigaragara ariko ngo ntibyoroshye cyane cyane ko hari ibyo ukorera abana bakabifata nko kubabuza uburenganzira bitewe n’imyaka yabo ariko bakazabona akamaro bkabyo bamaze kuva ku ntebe y’ishuri, ariyo mpamvu ngo bakora uko bashoboye ngo abana ntibavane ubwenge gusa mu ishuri ahubwo bahavane n’imyitwarire n’imitekerereze ikwiye.

Reba mu mafoto uko iki kigo kimeze nyuma y’imyaka 79 kimaze kibayeho, byinshi bygiye bihindukana n’imyaka:

Hafi y'amarembo ya G.S Ste Bernadette

Ugitunguka mu marembo

Ukigeramo imbere hari urukuta ruriho urwibutso rw'abazize jenoside yakorewe abatutsi bo muri iki kigo

Abashyitsi baca muri ibi biro

Ahahoze direction

Aha niho hari direction ubu

Aha ni mu masaha ya saa sita, abanyeshuri bamwe bari kurya, abarangije kurya nabo bari mu bindi bitandukanye

Iyi ni inzu yo kuraramo y'abakobwa

Hakurya ni mu nzu abanyeshuri bariramo

Aha ni amashuri yigirwamo, abanyeshuri bahita muri 'campus'

Inyuma y'amashuri hari agashyamba

Aho abanyeshuri banika imyenda

Andi mashuri yo mu ruhande rwa ruguru, abanyeshuri bahita muri 'cartier'

Aha hagiye hari imiryango irimo ibikorwa bitandukanye nka computer lab, inzu y'ibitabo, ahateranira abarimu n'ibindi

Aha ni mu nzu ntoya yo gusengeramo (chapelle)

Iki kigo gifite ubusitani bwiza cyane

Izi ni za laboratwari

Iyi ni inzu y'imyidagaduro

Mu nzu y'imyidagaduro hamanitsemo ishusho ya Bernadette Soubirous, umutagatifu iki kigo cyitiriwe

Iki ni ikimenyetso cy'ibonekerwa rya Bernadette Soubirous w'i Lourdes

Abanyeshuri baza gusengera aha hantu buri mugoroba 

Ni uku biba bimeze iyo uri imbere muri Ste Bernadette

Aha ni ku marembo usohoka

Inzu y'imyidagaduro uyirebeye hanze ku marembo y'ikigo

Ku macumbi y'abahungu, urebeye inyuma y'ikigo ku marembo

Kera hahoze hubakishije urugo rwa sipure

Hirya hubatse amacumbi y'abarimu

Inyuma haba hahinze imboga zitandukanye

Aho iki kigo kigabanira n'abaturanyi, ahakurikiyeho ni mu kigo cy'ababikira

Amafoto: UDAHOGORA Vanessa Peace @Inyarwanda