Kigali

Asaph Worship Band binjiye mu gikorwa cyo kumurika album yabo nshya y'amashusho 'Paid in Full' mu bitaramo bizaba mu minsi 3

Yanditswe na: Mupende Gedeon Ndayishimiye
Taliki:1/06/2018 8:50
0 0 0 0 0 Loading... 0

Kuva kuri uyu wa Gatanu tariki 1 Kamena 2018 kugeza ku Cyumweru tariki 3 Kamena 2018, Asaph Worship Band ibarizwa muri Zion Temple Nyarutarama iraba iri mu gikorwa cyo kumurika album yabo nshya y'amashusho bise 'Paid in Full' igizwe n'indirimbo 10.



Asaph Worship Band igizwe n'abaririmbyi batatu ari bo: Adeline, Serge na Chloé hakiyongeraho n'abacuranzi babo. Umushumba wabo; Pastor John Bosco Kanyangoga ni we mwanditsi w'indirimbo zabo. Asaph Worship Band ni Band y'itorero Zion Temple Nyarutarama, bakaba bafite intego yo kwamamaza ubutumwa bwiza bwa Yesu Kristo binyuze mu ndirimbo zo kuramya no guhimbaza Imana. 

UMVA HANO 'PAID IN FULL' YA ASAPH WORSHIP BAND

Asaph Worship Band baganira na Inyarwanda.com hari icyo basabye abakunda umuziki wo kuramya no guhimbaza Imana. Bagize bati: "Asaph worship band ibararitse mu kumurika album yacu nshya 'Paid in Full'.(...)Muzaze twifatanye mwese kuramya no guhimbaza Imana yacu muri iyi migoroba yose uko ari itatu. Ikindi cyiza twumva twabasangiza ni uko DVD zasohotse, abazifuza bazazitahana."

Asaph worship band

Chloé, Serge na Adeline bagize Asaph Worship Band

Asaph Worship Band bakomeje bavuga ko ibi bitaramo byose uko ari bitatu bizajya bibera ku cyicaro gikuru cya Zion Temple Celebration Center, Ngoma mu Gatenga guhera i saa kumi z'umugoroba. Amashusho y'iyi album bagiye kumurika, yafashwe mu gitaramo cyabaye tariki 6 Gicurasi 2018. Ni igitaramo cyabereye ku Kimihurura mu mujyi wa Kigali kuri Eglise Vivante de Jesus Christ (Living Church of Jesus Christ) gihembura benshi.

Album ya kabiri y'amashusho 'Paid in Full' bagiye kumurika igizwe n'indirimbo 10 zanditswe na Pastor John Bosco Kanyangoga uyobora Zion Temple paruwase ya Nyarutarama. Izo ndirimbo ni: Walls are falling down, Dance of freedom, Paid in Full, I will not fear, Nothing will stop me, Shimwa Yesu, Rule and Reign, My coming King, Send me Lord na Unstoppable Praise.

Asaph Worship Band

Asaph Worship Band hamwe n'umushumba wabo ubandikira indirimbo

Indirimbo 'Paid in Full' ari nayo yitiriwe album yabo ya kabiri, Asaph Worship Band batangaje ko bayihawe ubwo Umushumba wabo yari yasuye ihema ry'ibonaniro muri Israel mu rugendo rw'ubuhanuzi (Prophetic Tour) abakristo ba Zion Temple basanzwe bakora buri mwaka bagasura uduce dutandukanye muri Israel bayobowe n'umushumba mukuru; Apostle Dr Paul Gitwaza. Iyi album yabo nshya, bifuza ko yaba inzira Imana yakoresha mu guhesha umugisha ndetse no kubohora abantu bose bazayumva.

Asaph Worship Band

Igitaramo Asaph Worship Band baherutse gukora

Asaph Worship Band

Asaph Worship Band irabararitse mwese






Umwanditsi

Mupende Gedeon Ndayishimiye

-

Sura Umwanditsi Nyandikira

Inyarwanda BACKGROUND

Copyright © 2008-2019 Inyarwanda Ltd
RSS