Umuziki w'ubu ni mwiza ntibakawupfobye natwe ku gihe cyacu bavugaga ko uwa mbere yacu ari wo muzima - Makanyaga

Mu kiganiro Makanyaga yagiranye n’inyarwanda.com, yashimangiye ko umuziki nyarwanda wo muri iki gihe ari umuziki mwiza, uryoheye amatwi kandi utari munsi y’uwa cyera kuko bidakwiye no kugereranywa kuko bitari ibyo mu gihe kimwe, dore ko iyo ibihe bihindutse n’umuziki nawo uhinduka.

Makanyaga ntiyemeranywa n'abapfobya umuziki nyarwanda w'iki gihe

Makanyaga yagize ati: “Natwe cyera bajyaga batubwira ko umuziki wacu nta kigenda ahubwo uwatubanjirije ariwo wari mwiza kandi mu by’ukuri twakoraga umuziki mwiza, ubu baravuga ko uwo ku gihe cyacu ariwo wari mwiza ugereranyije n’uw’ubu ariko nka nyuma y’imyaka 20 uzasanga ab’icyo gihe bashimagiza uw’iki gihe ko ariwo wari mwiza, umuziki ni umuziki kandi mu bahanzi b’ubu b’abanyarwanda hari abakora umuziki mwiza cyane”.

Uyu musaza ukunze no gukorana indirimbo n’abahanzi batandukanye bo mu gihe cy’ubu cyane ababarizwa muri Kina Music, avuga ko nta muntu wari ukwiye gupfobya umuziki w’ubu kuko ugendana n’igihe tugezemo ariko akanenga na bamwe mu bahanzi batwawe n’iterambere rya mudasobwa ntibashishikarire kwiga ibicurangisho ngo bajye baririmba batitabaje ama CD kuko ibyo nta njyana nyayo y’umuziki biba bifite.

Aha mu ndirimbo Rubanda Remix Makanyaga yabyinanaga n'abahanzi bo muri Kina Music

Makanyaga ati: “Abahanzi b’ubu bafite umuziki mwiza ariko nibige n’ibicurangisho cyangwa se bitabaze itsinda ry’abacuranzi babacurangira mu bitaramo igihe baririmba, bageze ku bo bataramiye umuziki wa Live bitari bimwe byo gushyiramo CD kuko ibyo nta njyana y’umuziki yaba irimo”.

REBA UKUNTU MAKANYAGA YABYINISHIJE KNOWLESS ABANTU BAKUMIRWA:

Ese nawe uremeranywa na Makanyaga? Ubona se koko umuziki w’ubu ukwiye kugereranywa n’uwa cyera kandi ibihe nabyo atari bimwe?

Manirakiza Théogène