Umunyabigwi muri ruhago kuri uyu mubumbe dutuyeho, Lionel Messi, yamenyesheje ubuyobozi bw’iyi kipe ko agomba kuyisohokamo muri iyi mpeshyi nyuma y’imyaka 19 yose amaze mu muryango mugari w’iyi kipe yatumye aba ikirangirire ku Isi, inzira ze zikaba zishobora kmwerekeza mu Bufaransa cyangwa mu Bwongereza.
Uyu Munya-Argentine w'imyaka 33 y'amavuko, ejo ku wa kabiri yoherereje Barcelona ubutumwa mu buryo bwa 'fax' avuga ko yifuza gukoresha ingingo iri muri kontaro ye, imwemerera kuva muri Barcelona ku buntu kandi ako kanya.
Ibi bibaye nyuma yuko FC Barcelona igize umwaka mubi mu mateka yayo nyuma y’imyaka 13, yongeye kumara umwaka w’imikino idatwaye igikombe na kimwe, isezererwa nabi muri UEFA Champions League, aho yatsinzwe na Bayern Munich ibitego 8-2 muri ¼.
Messi yegukanye umupira wa zahabu - Ballon d'Or inshuro esheshatu, kikaba ari igihembo gihabwa umukinnyi w’indashyikirwa muri ruhaga ku Isi, kikaba gitangwa buri mwaka, yageze muri Barça mu mwaka wa 2001, atangira gukinira ikipe nkuru mu 2004. Yegukanye Champions League enye.
Gusa FC Barcelona yemeza ko iyo ngingo yo muri kontaro ubu yarengeje igihe, ko rero Messi afitanye amasezerano nayo yo kuyikinira kugeza mu mwaka wa 2021, kandi icyo gihe ikipe yamugura ikabanza kwishyura Barcelona miliyoni 700 z'ama-euro.
Biteganyijwe ko inama nkuru y'ubuyobozi bwa Barcelona iterana vuba aha, kandi bamwe bavuga ko ikintu kimwe cyonyine cyatuma Messi acururuka ari ukwegura kwa Perezida Josep Maria Bartomeu w'iyi kipe, kandi amatora akigizwa imbere.
Ariko bisa nkaho Messi yiyemeje kuva muri iyi kipe uko byagenda kose.
Nyuma yuko iyi nkuru imenyekanye, abafana ba Barça bateraniye hanze y'ikibuga cyayo Nou Camp barigaragambya bamagana ubuyobozi bukuru bw'iyi kipe ndetse bashyigikira uyu rutahizamu ufite agahigo ko kuyitsindira ibitego byinshi kurusha abandi.
Biteganyijwe ko hakurikiraho urubanza hagati y'iyi kipe n'uyu mukinnyi.
Messi yari afite ingingo muri kontaro ye yamwemereraga kuva muri iyi kipe ku buntu, iyo mbere y'itariki ya 10 y'ukwa gatandatu aza kuyimenyesha ko ashaka kuyivamo.
Iyo tariki ubu yararenze, none Barça yemeza ko iyo ngingo yataye agaciro, ariko Messi n'abo mu itsinda rye bumva ko ikwiye kwigizwa imbere ikareba n'uyu mwaka w'imikino wongerewe - ukageza muri uku kwezi kwa munani kubera icyorezo cya coronavirus.
Kuri Twitter, Carles Puyol wahoze akinana na Messi yanditse ati: "Ndakubaha kandi ndakwemera, Leo. Ndagushyigikiye jyewe wese, nshuti".
Kuri ubwo butumwa bwa Puyol, Luis Suarez ukinana na Messi kuri ubu, yasubije n'udushusho (emojis) tubiri dukoma amashyi.
Amakuru avuga ko amakipe abiri akomeye aturuka mu bihugu bibiri by’I Burayi yatangiye kuganiriza uyu rutahizamu kugirango abe yayerekezamo.
Manchester City ya Pep Guardiola niyo yabimburiye izindi kugaragaza ko yifuza Messi, amakuru ava mu nshuti ze atangaza ko yifuza kwerekeza Etihad agasanga umutoza bakoranye muri Barcelona kandi ngo ni ibintu bishoboka cyane.
Ku rundi ruhande ikipe ya PSG yo mu Bufaransa nayo yinjiye mu rugamba rwo gushaka Messi nk’urufunguzo rwatuma iyi kipe yegukana UEFA Champions League imaze igihe yirukaho yarayibuze.
Biteganyijwe ko mu gihe cya vuba ahazaza ha Lionel Messi haza kumenyekana, birashoboka ko yaguma i Catalonia cyangwa akahava nkuko abyifuza.
Messi yamenyesheje ubuyobozi bwa FC Barcelona ko agomba kuyisohokamo muri iyi mpeshyi
Eng
RSS 
TANGA IGITECYEREZO