Burundi: Le Messager Ngozi yegukanye igikombe cya Shampiyona, LLB iheruka mu mikino nyafurika imanuka mu cya kabiri

Nubwo shampiyona y’icyiciro cya mbere mu gihugu cy’u Burundi ibura umukino umwe ngo ishyirweho akadomo, ntibyabuije ikipe ya Le Messager Ngozi kwegukana igikombe nyuma yo gutsinda itababariye ikipe ya Inter Star ibitego 3-0, mu gihe Musongati bari bahanganiye igikombe yari imaze kunganya na Kayanza United 1-1.

Kuri sitade Urukundo iherereye mu ntara ya Ngozi, ikipe ya Le Messager Ngozi ibifashijwemo na Iddy Mseremu wuzuzaga ibitego 17 muri shampiyona, Olivier Bayizere n’icya Arthur Niyibikora w’imyaka 17 y’amavuko, yegukanye igikombe cyayo cya kabiri n’amanota 61 ikurikiwe na Musongati ifite amanota 56, binayha uburenganzira bwo kuzaagararira u Burundi mu mikino ya CAF Champions League umwaka utaha.

Bigaragara ko Lydia Lyudic Burundi sports for Africa (LLB S4A), isa nk‘iyamanutse mu cyiciro cya kabiri n’ubwo yatsinze Vital’o ibitego 2-1, mu mukino wabereye kuri stade Intwali mu mujyi wa Bujumbura, iyi kipe yari mu marushanwa ya CAF Confederations Cup mu mwaka w’imikino wa 2017/2018 aho yasezerewe na Rayon Sports yo mu Rwanda ku giteranyo cyibitego 2-1.

Imanutse mu cyiciro cya kabiri nyuma y’imyaka 3 gusa itwaye igikombe cya shampiyona ahanini kubera ubuyobozi bubi bw’iyi kipe.

LLB ifite amanota 32 n’umwenda w’ibitego 19, Bumamuru iyibanziriza ifite amanota 35 ikaba izigamye izigamye ibitego 3, bikaba bigoye ko LLB umukino wa nyuma izakina na Kayanza yawutsinda ibitego birenga 20-0 kandi nabwo ikizera ko Bumamuru izaba yatsinzwe na Olympic stars.

Amakipe yaje mu myanya ya nyuma Ni LLB Academic n’amanota 32, Ngozi City 22 na Les Lierres yagize 20 zose mu mikino 29 zakinnye, bikaba binasobanuye ko arizo zamanutse mu cyiciro cya kabiri.

Le Messager Ngozi yegukanye igikombe cya shampiyona y'u Burundi 2019/20