UEFA yatangaje igihe Champions League na Europa League bizasubukurirwa n’igihe bizasorezwa

Kuwa 13 Werurwe 2020, ni bwo byemejwe ko amarushanwa UEFA itegura arimo Champions League na Europa League, ahagaritswe kubera COVID-19 yari imaze kwibasira umubare munini w’abakinnyi, abatoza ndetse n’abafana. UEFA yavuze ko yifuza ko aya marushanwa yasubukurwa hagati ya tariki 02 na 07 Kanama agasozwa tariki ya 27 Kanama 2020.

Dore amatariki y’ingenzi UEFA fuza ko imikino yasubukurwaho n’igihe asorezwa:

Tariki 2 – 7 Kanama 2020

Imikino ya 1/8 muri Champions League and Europa League(Champions League and Europa League last-16 ties).

Tariki 13 – 16 Kanama 2020

Imikino ya ¼ muri Champions League and Europe League(Champions League and Europe League quarter-finals).

Tariki 20 – 23 Kanama 2020

Imikino ya ½ muri Champions League and Europa League (Champions League and Europa League semi-finals).

Tariki 27 Kanama 2020

 Umukino wa nyuma wa Europa League (Europa League final).

Tariki 29 Kanama 2020

Umukino wa nyuma wa Champions League(Champions League final).

Perezida wa Lyon, Jean-Michel Aulas, yatangaje ko nubwo UEFA itaratangaza itariki ntakuka aya marushanwa agomba gukinwaho, ariko ikipe ye izi neza ko izakina na Juventus mu mukino wo kwishyura wa 1/16 cya Champions League kuwa 07 Kanama 2020, mu mukino uzakinwa nta bafana bahari.

Perezida wa UEFA, Aleksandar Ceferin, yaherukaga gutangaza ko icyorezo cya Coronavirus nikigabanuka bazashyiraho amasaha n’igihe cy’imikino gishya aho binashoboka ko hazakinwa umukino umwe umwe muri buri kiciro aho gukina ubanza n’uwo kwishyura. 

Mu kiganiro Aleksandar Ceferin yahaye TV yo mu Budage yitwa ZDF kuwa 04 Mata 2020, yagize ati “Champions League na Europa League bigomba kutangira bitarenze tariki 3 Kanama 2020.Turi mu bihe bidasanzwe ni yo mpamvu twiteguye guhindura amatariki n’amasaha. Icyorezo kirangiye vuba, twahita dutangira”.

Hari amakuru avuga ko muri aya marushanwa yombi hatazongera gukinwa umukino ubanza nuwo kwishyura ahubwo ngo hazakinwa umukino umwe uzajya ubera ku kibuga cyihariye ibintu Aleksandar Ceferin yavuze ko nabyo bishoboka.

Yagize ati “Dushobora gukomeza gukina mu buryo bari busanzwe,cyangwa se hagakinwa umukino umwe ubera ku kibuga cyihariye[kidakinirwaho n’imwe mu makipe yahuye].Ibyo birashoboka muri ¼ na ½ cy’irangiza.

Umwanzuro mubi twafata nuwo gukina mu buryo bwatuma dushyira ubuzima bw’abakinnyi,abafana n’abasifuzi mu kaga.Igihe tuzaba dufite umutekano nta kibazo cyatuma tudakina.”

Muri Europa League, hakinwe imikino itandatu ibanza ya 1/8 mu gihe indi ibiri yasubitswe kubera Coronavirus.

Imikino yo kwishyura ya 1/8 muri UEFA Champions League yari isigaye gukinwa ni uwa Manchester City na Real Madrid, Juventus na Lyon, FC Barcelona na Napoli ndetse na Bayern Munich na Chelsea. Amakipe ane yo yamaze kubona itike ya ¼ ni RB Leipzig, Atalanta, Atlético Madrid na Paris Saint-Germain.