RFL
Kigali

Coronavirus: Umutungo w'umuherwe Jeff Bezos nyiri Amazon wiyongereyeho Miliyari $24

Yanditswe na: Eric Misigaro
Taliki:15/04/2020 15:56
0

Umutungo w'uwashinze akaba n'umuyobozi w'urubuga rw'ubucuruzi bwo kuri internet rwa Amazon wiyongereyeho Miliyari 24 z'amadolari y'Amerika muri iki gihe cya coronavirus. Iyi nyungu Bezos yayibonye mu gihe benshi ku Isi bari mu gihombo gikabije.



Ubwiyongere bw’umutungo wa Jeff Bezos byatewe n'uko urubuga rwa Amazon abantu barimo kurukoresha cyane mu bikorwa byo guhaha muri ibi bihe bidasanzwe by'akato muri gahunda ya Guma Mu Rugo (#Stayathome) mu kwirinda ikwirakwira rya Covid-19.

Ubu, Jeff Bezos w'imyaka 56, afite umutungo ubarirwa muri Miliyari 138 z'amadolari y'Amerika, nk'uko bitangazwa na Bloomberg Billionaires Index. Byatumye ashimangira umwanya we nk'umuntu wa mbere ukize cyane ku isi.

Kompanyi ye yungukiye cyane ku kuba abantu ku isi bari kuguma mu ngo zabo bagatumiza ibyo bacyeneye kuri internet, muri iki gihe cy'icyorezo cya Covid-19.

Byabaye ngombwa ko iha akazi abakozi babarirwa mu bihumbi kugira ngo ibashe guhaza abakiliya bayo biyongereye cyane muri iki gihe.

Ariko Amazon yananenzwe n'abakozi bayo muri Amerika ku bijyanye n'ingamba zo kubarinda ku kazi muri iki gihe cya coronavirus.

Bwana Bezos afite imigabane ingana na 11% muri Amazon, kandi ejo ku wa kabiri, imigabane yayo yiyongereyeho 5.3%. 

Umuryango nyir'ikigo cy'ubucuruzi cya Wal-Mart, gifite iduka rya Asda mu Bwongereza, na wo warungutse muri iki gihe cy'ibihe bidasanzwe by'akato.

Umutungo w'uwo muryango - uzwi nka The Waltons - wiyongereyeho 5% muri uyu mwaka ugera kuri miliyari 169 z'amadolari y'Amerika. Ubu ni wo muryango wa mbere w'abaherwe ku isi, nk'uko bitangazwa na Bloomberg. 

Mu gihe abantu babarirwa muri za Miliyoni ubu bari gukorera mu ngo mu bice bitandukanye byo ku isi, umutungo w'uwashinze urubuga rw'inama zo kuri internet na wo wariyongereye.

Umutungo wa Eric Yuan washinze urubuga Zoom wikubye inshuro zirenga ebyiri, ugera kuri miliyari 7.4 z'amadolari y'Amerika.

Bloomberg Billionaires Index itangaza ko kugeza ubu muri uyu mwaka, abaherwe 500 ba mbere ku isi bamaze guhomba agera kuri miliyari 553 z'amadolari y'Amerika

Abashoramari mu rwego rw'ibikomoka kuri peteroli ndetse no muri 'gas' barahombye cyane kubera ko ibiciro byaguye kubera igabanuka ry'ababicyeneye ku isi.

Byanatewe kandi n'amakimbirane - ubu yamaze gucyemuka - hagati ya Arabie Saoudite n'Uburusiya ashingiye ku musaruro w'ibikomoka kuri peteroli. Ikigo cya Amazon gifite laburatwari ipima abakozi bacyo icyorezo cya coronavirus.

Src: bcc.com  


Tags:




TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND