Thomas Partey yakuriye inzira ku murima amakipe yamwifuzaga agenera ubutumwa Atletico Madrid - AMAFOTO

Mu minsi ishize amakipe menshi atandukanye, byumwihariko ayo mu gihugu cy’Ubutaliyani ndetse no mu Bwongereza, yagaragaje cyane ko yifuza Thomas Partey, kapiteni wungirije mu ikipe ya Ghana izwi nka Black Stars, wagaragaje ko adashaka kuva Wanda Metropolitano ku kibuga cya Atletico Madrid amaze kubakira ibigwi n’amateka.

Ubuyobozi bw’ikipe ya Atletico Madrid nyuma yuko bwumvise amwe mu makipe azana igitekerezo cyo kugura Partey ufatiye runini Atletico byumwihariko mu gice cyo kugarira, bwatangiye ibiganiro n’uyu musore kugira ngo bavugurure amasezerano afite muri iyi kipe.

Thomas Partey waraye wigaragaje cyane mu mukino Atletico Madrid yatsinzemo Liverpool mu irushanwa rya Champions League igitego 1-0 muri Espagne, yahishuye kop yifuza kuguma muri iyi kipe anashimagiza umutoza Simeone.

Yagize ati”Ndumva merewe neza, nifitiye icyizere, numva meze neza iyo ndi mu ikipe iri mu bihe byiza”.

“Simeone ni nk’umwarimu wacu, ni nka Papa wacu twe nk’abakinnyi, biradufasha cyane. Atletico ni nko mu rugo, ni ahantu mpora numva nshaka kuba, ni nk’umuryango wanjye”.

“Nizeye ko nzaguma muri iyi kipe, nifuza kuzahasoreza umwuga wo gukina umupira w’amaguru, gusa ariko ntiwamenya icyo iminsi ihatse, gusa ku bwanjye nifuza kuzaguma muri iyi kipe kugeza igihe bazanyereka ko batakinkeye”.

Uyu musore w’umunya-Ghana ni umwe mu bakinnyi bakina neza mu kibuga hagati, ndetse akaba yaremeje umutoza Diego Simeone, aramwizera amuha umwanya ubanza mu kibuga igihe cyose.

Thomas yatangaje ko yifuza gusoreza umupira w'amaguru muri Atletico

Partey ni umwe mu bakinnyi bafatiye runini Atletico

Partey ni umwe mu bakinnyi beza bakina mu kibuga hagati ku Isi

Partey yafashije ikipe ye ku mukino wa Liverpool

Partey akinira ikipe y'igihugu ya Ghana