Mikhail Gorbachev avuga ko uko ibintu bimeze uyu munsi hagati y'u Burusiya n'ibihugu by'Iburengerazuba biteye ubwoba ndetse yemeza ko bikiri mu ntambara.
Mu kiganiro na BBC, Bwana Gorbachev yabajijwe ku mibanire
y'igihugu cye n'ibihugu by'Iburengerazuba, yasubije ati: "Igihe cyose
intwaro za kirimbuzi zikiriho, isi iri mu kaga gakomeye".
Mu gihe
yari Perezida w'igihugu cye hagati ya 1988 na 1990 kimwe mu bintu bikomeye
yagezeho ni uguhagarika kurushanwa kwigwizaho ibitwaro kirimbuzi na Amerika.
We na Perezida Ronald Reagan wa Amerika basinye amasezerano
yo kugabanya ibitwaro kirimbuzi babitse mu nzu z'intwaro zabo.
Aganira na BBC yagize ati: "Ibihugu byose bikwiye
guhaguruka bikavuga biti izi ntwaro zose zigomba gusenywa. Ibi nibyo
byadutabara bikanatabara umubumbe wacu".
Mu gihe gito gishize, Amerika n'Uburusiya byavuye ku
masezerano yasinywe na Bwana Gorbachev na Bwana Reagan.
Bwana Gorbachev yagize uruhare rukomeye mu kurangiza
intambara y'ubutita hagati ya Amerika n'Uburusiya, biri mu byatumye ahabwa
igihembo cy'amahoro kitiriwe Nobel mu 1990.
Ati:
"Ubu hari urwikekwe ariko n'ubundi ni intambara. Reba ahantu hatandukanye,
hari imirwano. Indege n'amato by'intambara biri koherezwa hirya no hino, ibi
ntabwo ari byo twifuza".
Bwana Gorbachev nyuma yo kwegura ku butegetsi mu 1990 yagiye
anenga politiki z'abamusimbuye Boris Yeltsin wabaye Perezida wa mbere
w'Uburusiya na Vladimir Putin.
Afatwa nk'umuntu waharaniye amahoro, impinduka mu kubahiriza
uburenganzira bwa muntu n'ubwisanzure bw'itangazamakuru mu Burusiya.
Mu Burusiya anengwa kuba atarabashije guhagarika isenyuka rya
leta zunze ubumwe z'Abasoviyeti, ikintu cyagabanyije ubuhangange n'ijambo
by'Uburusiya ku isi kikanateza ibibazo by'ubukungu.
Src: BBC
TANGA IGITECYEREZO