CYCLING: Ikipe y’igihugu ya DR Congo mu makipe azakina Rwanda Cycling Cup kuri uyu wa 6 i Musanze

Ku mugoroba w’uyu wa Gatanu tariki 28 Kamena 2019 saa tatu zuzuye (21h00’) ni bwo ikipe y’igihugu ya DR Congo yasesekaye ku kibuga cy’indege mpuzamahanga cya Kigali kiri i Kanombe aho bahise berecyeza mu kigo Nyafurika giteza imbere umukino w’amagare kiri i Musanze. Iyi kipe yaje kwitegura Tour du Congo 2019 iteganyijwe kuva tariki 21 Nyakanga 2019.

Ikipe ya DR Congo izakina Musanze Circuit 2019

Kuri uyu wa Gatandatu rero, abaturiye ibice bya Musanze na Gakenke bazaryoherwa n’igare kuko abahungu n’abakobwa bazaba babucyereye basiganwa mu buryo bushoboka bwose (Northern Challenge).

Northern Challenge izakinwa abakinnyi bazenguruka mu mujyi wa Musanze mu muzenguruko (Circuit) y’ibirometero 6.7km .

Muri uru rugendo, abasiganwa bazahaguruka imbere y’Isoko-National Police Academy-WASAC-Saint Vincent-Stade Ubworoherane-Sonrise High School-Ku Ibereshi babone kugruka ku isoko.

Iyi nzira, abahungu bari mu cyiciro cy’abakiri bato bazayizenguruka inshuro 15 (100.5 Km) mu gihe abakobwa bazazenguruka inshuro 12 (80,4 Km).

Abasiganwa ku magare bazazenguruka umujyi wa Musanze

Mu cyiciro cy’bagabo bo bazahaguruka i Musanze bakatire mu Gakenke bagaruke basubire i Musanze babone kuzenguruka inshuro 12 bakazakora intera y’ibirometero 143.4 byose hamwe (143.4 Km).

Iri rushanwa ryabanjirijwe na shampiyona 2019 yatwawe na Bonaventure Uwizeyimana wahize abandi muri Road Race mu gihe Areruya Joseph yatwaye Individual Time Trial aho buri mukinnyi aba asiganwa n’ibihe.

Mu bakobwa, shampiyona 2019 ibitswe na Nzayisenga Valentine mu gice cy’umuhanda (Road Race) mu gihe muri Individual Time Trial ifitwe na Josiane Mukashema.

Irushanwa rizaba riba nyuma ya shampiyona 2019

Amakipe icumi (10) niyo azitabira iri siganwa kuko arimo; SKOL Fly Cycling Club, Les Amis Sportifs de Rwamagana, Cycling Club For All, Benediction Excel Energy, Muhazi Cycling Generation, Karongi Vision Sport Center, Kigali Cycling Team, Nyabihu Cycling Team, Kayonza Young Stars Cycling Team na RC Congo National Team.