Liverpool yabuze Champions League, Mo Salah abura Ballon d'Or

Mu ijoro ryakeye, ikipe ya Liverpool yari yitezweho kwegukana akangari k’ibikombe uyu mwaka w’imikino, yongeye kugwa munsi y’urugo isezererwa na Paris Saint Germain iyitsinze kuri penalite 4-1 nyuma y’uko banganyije igitego 1-1.

Kugeza aka kanya, Liverpool imaze gutsinda ibitego 174 mu marushanwa yose yakinwe uyu mwaka w’imikino (2024-2025) aho muri Premier League imaze gutsinda ibitego 116, Salah akaba ariwe uyoboye abandi n’ibitego 25.

Liverpool imaze gutsinda ibitego 7 mu marushanwa nka FA na Carbao Cup mu gihe muri Champions League yasezewemo yari imaze gutsinda ibitego 30.

Imibare myiza n’abakinnyi beza ba Liverpool ntabwo byayihesheje gukomeza muri ¼ cya Champions League, riba irushanwa rya kabiri Liverpool isezerewemo nyuma yo gusezererwa muri FA Cup.

Mohamed Salah yabuze Ballon d'Or

Bisa nk’aho Mohamed Salah yari abundikiriye amahirwe yo gukomeza gutera ikirenge kigana i Paris ngo yegukane Ballon d'Or yayonze ku bwo kudakomeza kwitwara neza.

Imibare igaragaza ko Liverpool ifite amahirwe menshi yo kwegukana 'Premier League' y'uyu mwaka. Iyo ikomeza kwitwara neza igatwara Champions League, ukongeraho no gutwara Premier League, nta kabuza Mo Salah yari kuzahabwa Ballon d'Or.

Mu gutanga amanota y’uwegukana Ballon d'Or (Igikombe cy’umukinnyi mwiza ku Isi) hagenderwa ahanini ku bikombe umuntu aba yaregukanye ndetse n’ikipe muri rusange hanyuma hakarebwa ku musaruro w’umuntu ku giti cye.

Uti bibarwa bite? Umusaruro w’umuntu ku giti cye uhabwa amanota hagati ya 50-60%, agaciro k’ibikombe umuntu yatwaye kagahabwa agaciro ka 20-30%, uruhare n’uburyo ayobora abandi mu kibuga bikagira agaciro ka 10-15% hanyuma kwitwara neza ku bandi bakinnyi muhanganye bikagira agaciro ka 5-10%.

Aha bigaragara ko n’iyo Mohamed Sallah yakomeza kwitwara neza, ku manota agenewe ibikombe umuntu yatwaye niho Mohamed Salah yagwa cyane ko n’iyo mibare myiza abandi bakinnyi bashobora kuyigeraho cyangwa bakaba bari munsi ye gato.

Anifield yabaye imbehe y’abashyitsi muri Champions League

Kugeza aka kanya, mu mikino 5 iheruka yo gukuranwamo muri Champions League yakiniwe ku kibuga cya Liverpool, ntabwo Liverpool yigeze yitwara neza dore ko nta ntsinzi n’imwe bafite.

Kuri uyu wa 11 Werurwe 2025, Paris Saint Germain yatsinze Liverpool iyisanze iwayo igitego 1-0 mu mikino ya 1/8 cya Champions League.

Ku wa 21 Gashyantare 2023, Liverpool yatsindiwe iwayo na Real Madrid ibitego 5-2 mu mikino ibanza ya 1/8 ya Champions League.

Ku wa 13 Mata 2022, Liverpool yanganyije na Benfica ibitego 3-3 ku kibuga cya Anifield gusa iza gukomeza kuko yari yatsindiye Benefica iwayo.

Ku wa 08 Werurwe 2022, Liverpool yatsinzwe na Inter Milan igitego 1-0 mu mikino ya 1/8 gusa ikomeza muri ¼ ku giteranyo cy’ibitego 2-1.

Ku wa 14 Mata 2021, Liverpool yaguye miswi na Real Madrid bituma inasezererwa kuko yatsindiwe muri Spain ibitego 3-1 bituma itabasha kurenga muri ¼.

Muri macye, ubushongore n’ubukaka bwa Liverpool ku kibuga cyayo bukomeje kugenda bukura bwirindiriza cyane ko iyo yasuwe muri iyi mikino yo gukuranwamo ititwara neza ahubwo bisaba ko itsindira hanze ibitego byinshi.

Ibi byashimangiwe ku mugoroba wo kuri uyu wa kabiri aho Liverpool yabuze igitego kimwe mu minota 120 cyari kuyihesha gukomeza n’ubwo umuzamu wa Paris Saint Germain yabaye maso agatabara ikipe ye aho byari bikomeye ndetse anegukana igikombe cy’umukinnyi witwaye neza.

Igitego cya Dembele ni cyo cyagize uruhare mu isezererwa Liverpool

Amahirwe yo kwegukana Ballon d'Or kuri Salah, yayoyotse

Paris Saint Germain yashimangiye ko bwa bushongore n'ubukaka bwa Liverpool iwayo buri kuyoyoka