Savio Nshuti avuga ko yahoze arota gukinira APR FC kubera Mugiraneza Jean Baptiste Miggy

Nshuti Savio yasinye amasezerano y’imyaka ibiri azamara akinira iyi kipe ifite igikombe cy’amahoro cya 2017, kuri ubu agomba gutangira gukorera iyi kipe ahura na Rayon Sports yavuyemo agana muri AS Kigali atamazemo kabiri.

Aganira n’abanyamakuru, Savio yavuze ko yakuze abona Mugiraneza Jean Baptiste bita Miggy amubona akina ku Mumena bityo ajya muri APR FC abona ari gutera imbere bityo nawe atangira kugira inyota yo kuba yajya muri iyi kipe y’ingabo z’igihugu.

“Urebye nturuka muri Quartier (Agace) yo ku Mumena. Nabonaga ibyo bagenzi banjye bari kugeraho nka ba Miggy , nkumva natera ikirenge mu cyabo. Miggy yagiye muri APR FC nanjye kubera numvaga ariwe ndi kugenderaho numva nayikinira” Nshuti Dominique Savio

Kuri uyu wa Kane tariki ya 1 Gashyantare 2018 ni bwo APR FC igomba guhura na Rayon Sports mu mukino usoza irushanwa ry’Intwali 2018, umukino Savio agomba gukina ahura n’abakinnyi basangiye akabisi n’agahiye. Uyu musore avuga ko uzaba ari umukino utoroshye ariko azaba agerageza kwitwara neza.

“Ni umukino ukomeye, ni nkaho nsubiye muri Derby (Umukino w’ishiraniro). Mbere nakiniraga Rayon (Sports), ubu nzaba ndi gukinira APR FC, urumva ni umukino uzaba ukomeye kuri njye. Ni umupira.. mu buzima ugomba guhura nabyo , ndumva nzagerageza kwitwara neza”.

Mugiraneza Jean Baptiste Miggy kapiteni wa APR FC ni we Savio Nshuti agenderaho

Uyu mukinnyi yakoze imyitozo ya mbere ku kibuga cya Kicukiro, yakirwa n’abafana kuko banagize umwanya wo kumuterura bakamwumvisha umunyenga. Savio yabashimiye avuga ko yumva yageze mu rugo kuko hari abakinnyi basanzwe ari inshuti ze.

“Icya mbere ni ukubanza kubashimira uburyo banyakiriye. Ni ibintu binzaniye icyizere no kunyereka ko bamfitiye urukundo. Muri APR FC hari abakinnyi benshi b’inshuti zanjye ntabwo byangoye cyane kuko harimo n’abavandimwe duturuka mu gace kamwe …ba Miggy, ba Abouba (Sibomana)..ndumva ari ibintu byashimishije cyane”. Savio Nshuti

Nshuti Dominique Savio asanga abandi bakinnyi ba APR FC

Mugiraneza Jean Baptiste Miggy niwe kapiteni wa APR FC ahetse Twizerimana Onesme watsinze ibitego bitatu mu myitozo ku mipira yose yahawe na Buteera Andrew

Rugwiro Herve ahetse Sekamana Maxime 

Kuri uyu wa Kabiri APR FC irakorera imyitozo i Shyorongi

Sibomana Abouba bita Bakary ni umwe mu nshuti za Savio Nshuti

Mugiraneza Jean Baptiste Miggy ni we kapiteni wa APR FC

Mugiraneza (ibumoso) afatwa nk'umukinnyi unafasha abatoza (Player-Coach) kuko aha yagiraga inama Byiringiro Lague (iburyo) utaratsinda igitego

Nshuti Dominique Savio yashimye uko yakiriwe n'abafana 

Nyuma y’imikino ibiri buri kipe imaze gukina, Rayon Sports yatsinze umwe (1) inganya undi ni yo mpamvu iyoboye urutonde n’amanota ane (4) ikazigama ibitego bine (4). Police Fc iraza ku mwanya wa kabiri n’amanota atatu (3) n’umwenda w’ibitego bitatu (3). AS Kigali irafata umwanya wa gatatu(3) n’amanota abiri (2) mu gihe APR FC iri ku mwanya wa kane n’inota rimwe (1).