Kitoko Bibarwa ni umwe mu bahanzi bubashywe muri muzika nyarwanda gusa akubahwa bikomeye mu njyana ye ya Afrobeat, uyu muhanzi waririmbye nyinshi mu ndirimbo zakunzwe nka Ikiragi, Bikiramariya, I love you, n’izindi kuri ubu ashobora kuba ari mu rukundo n’umunyamakuru w’umunyarwandakazi.
Ubusanzwe si kenshi Kitoko akunze kugarukwaho mu itangazamakuru avugwa mu nkuru z’urukundo, gusa kuri iyi nshuro uyu muhanzi hari amakuru ko yaba ari mu rukundo rw’ibanga ndetse ngo rugeze ahakomeye hagati ye n’umunyamakuru Ngabonziza Kizima Joella wamenyekanye cyane asoma amakuru kuri Lemigo tv yaje kuba Royal Tv nkuko amakuru ava imbere mu nshuti zabo abihamya.
Ifoto ya Kizima Ngabonziza Joella, Kitoko yashyize kuri Instagram iherekejwe n'umutima
Ibi gusa byaje no kwigaragaza kuva tariki 11 Gashyantare 2017 ubwo Kitoko yashyiraga ifoto y’uyu mukobwa ku rukuta rwe rwa Instagram, umukobwa nawe ku munsi mukuru w’abakundanye uzwi nka St Valentin yahise ashyira ku rukuta rwe rwa Instagram ifoto ya Kitoko aba bose bakaba barahurizaga ku gushyira imitima munsi y’aya mafoto, ibi byafashwe nk’ikimenyetso cy’urukundo hagati yabo.
Umunyamakuru wa Inyarwanda.com washatse kumenya amakuru neza y’uru rukundo ntibyamushobokeye kuvugisha Kitoko kuko uyu mugabo wibera mu Bwongereza atarari ku murongo wa telefone ye isanzwe. Gusa nubwo tutabonye inkuru mpamo iva kuri ba nyir'ubwite, umwe mu nshuti z'aba bombi waganiriye na Inyarwanda.com yahamije ko aya makuru ari impamo ndetse bakundana urukundo rwabo rugeze aharyoshye.
Uyu mukobwa nawe ku munsi w'abakundanye yashyize Kitoko ku rukuta rwe rwa Instagram
Uyu waduhaye aya makuru yatangaje ko aba bombi bakundana gusa bari bahisemo kubigira ibanga kugira ngo itangazamakuru ritazabyasasa ngo byamamare bityo bahitamo gukundana mu ibanga ariko yongeraho ko nubwo babigize ibanga urukundo rwabo rumaze gushinga imizi ku buryo mu mishanga bafite bashobora no gukora ibirori bakabana.
Eng
RSS 
TANGA IGITECYEREZO