Ahabanza Utuntu nutundi

Uko Habyarimana Juvenal yari afite amakuru y’uko ashobora kwicwa

Yanditswe na: Niyigena Geovanie
Taliki:7/04/2025 14:31 0

Mbere gato y’uko Juvenal Habyarimana ahanurwa mu ndege yarimo ndetse agahita apfa, yari amaze igihe yikanga kwicwa.

Inama y’Abaminisitiri yateranye ku wa 15 Werurwe 1990 ni yo yafatiwemo umwanzuro ntakuka wo kumuha indege ngo ajye ayikoresha mu ngendo z’akazi, binaba n'igisubizo ku mutekano we yari afitiye impungenge.

Ubwo Perezida Habyarimana yahabwaga iyi ndege, yari amaze iminsi agaragariza u Bufaransa ko afite impungenge ku bijyanye n’umutekano w’ikibuga cy’indege cy’i Kigali ku buryo ngo yari yaranasabye ko Abafaransa bamusanira radar yari yarapfuye cyangwa bakaba bamuha indi nshyashya.

Raporo yakozwe na Komisiyo yari iyobowe na Dr Mutsinzi Jean ku ihanurwa ry’indege ya Habyarimana, igaragaza ko yapfuye yari amaze igihe abyiyumvamo ndetse akaba yari yaragiye asubika ingendo zitandukanye nk’urwo gushyingura Melchior Ndadaye wari Perezida w’u Burundi na Félix Houphouët-Boigny wa Côte d’Ivoire.

Iyi raporo igaragaza ko Johann Scheers wari inshuti ya Habyarimana akaba n’Umujyanama we mu by’Amategeko, yahishuye ko uyu mugabo yari yaramugaragarije impungenge z’uko ashobora kwicwa.

Johann Scheers yavuze ko muri Gashyantare 1994 Habyarimana yari yaramubwiye ko hari ibyago byinshi byo kwicwa mu gihe yaba agiriye urugendo hanze y’igihugu, iki gihe ngo yamubwiye ko u Bubiligi butakimuba hafi kuva Umwami Baudouin yapfa.

Mu rwego rwo kuganira kuri iki kibazo, ngo Johann Scheers yamubwiye ko bazahura mu muhango wo gushyingura Félix Houphouët-Boigny bakanabiganiraho bari kumwe n’Igikomangoma cy’u Bubiligi, Phillippe.

Mu buryo butunguranye ku wa 7 Gashyantare, Habyarimana ngo yaje kwanga ubu butumire kubera impamvu z’umutekano.

Nyuma yo kumva aya makuru Johann Scheers yabwiye Habyarimana ati “Bwana Perezida, nizere ko ufite impamvu zumvikana kubera ko nta bundi buryo mfite nabisobanura.”

Habyarimana ngo mu kumusubiza yavuze ko ahangayikishijwe n’umutekano we. Ati “Mfite ubwoba bw’uko hazagira ikimbaho nsohotse mu gihugu.”

Johann Scheers yavuze ko Habyarimana yari afite impungenge z’uko indege ye yahanurwa mu gihe yaba agiriye urugendo hanze y’igihugu.

Jenoside yakorewe Abatutsi mu 1994 yateguwe ndetse igakorwa na Leta ya Habyarimana, yahitanye ubuzima bw'inzirakarengane zisaga miliyoni. Yahagaritswe n'ingabo zari iza RPA zari zirangajwe imbere na Nyakubahwa Paul Kagame.

Nyuma y'igihe afite ubwoba ko abamuri hafi bamwica, Perezida Juvenal Habyarimana yishwe mu ijoro ryo ku wa 06 Mata 1994 ndetse Jenoside yakorewe Abatutsi ihita itangira ku mugaragaro