Amavubi yongeye gusubira inyuma ku rutonde rwa FIFA nyuma yo kunganya na Lesotho

‎Ni ibigaragara muri 'system' isanzwe ikoreshwa na FIFA mu kubara amanota ndetse no kugena uko amakipe akurikirana buri kwezi.

‎‎Kuri uru rutonde rwa FIFA rwerekana uko amakipe y'ibihugu ahagaze nyuma y'imikino yakinwe kugeza ku munsi w'ejo, Amavubi yamanutseho umwanya umwe ava ku mwanya wa 129 ajya ku wa 130. Yatakaje amanota 2.2 aho kuri ubu afite amanota 1,127.36.

‎‎Ibi bibaye nyuma y'uko Amavubi anganyije na Lesotho 1-1 ku munsi w'ejo mu gushaka itike y'igikombe cy'Isi cya 2026. 

‎‎Bivuze ko nyuma y'iyi mikino ibiri ikipe y'igihugu y'u Rwanda ikinnye irimo n'uwa Nigeria  itakaje imyanya 6 dore ko mbere yayo yari ku mwanya wa 124.

‎‎Nyuma yo gutsindwa na Nigeria ibitego 2-0 yari yahise ijya ku mwanya wa 129 none kuri ubu iri kuwa 130.

‎‎Nta mpinduka nyinshi zigaragara mu myanya 15 ya mbere ku Isi aho Argentine, u Bufaransa, Espagne, u Bwongereza, Brésil, u Bubiligi, u Buholandi, Portugal, u Budage n’u Butaliyani biri mu bihugu 10 bya mbere.

‎Muri Afurika, ibihugu bitandatu bya mbere ni Maroc, Sénégal, Misiri, Algeria,Cote D'Ivoire na Nigeria.

‎

Amavubi ari ku mwanya wa 130 ku rutonde rwa FIFA