Novak Djokovic yagaragaje ko afite intego nshya

Uyu munya-Serbia w’imyaka 37, umaze gutwara Grand Slam 24, yemeje ko yifuza gukomeza kwigaragaza mu marushanwa akomeye aho kwiruka ku manota amufasha kuba uwa mbere ku isi.

Djokovic amaze ibyumweru birenga 400 ari nimero ya mbere ku isi, ariko kuri ubu ari ku mwanya wa gatanu. 

Nubwo bimeze gutyo, yagaragaje ko agifite imbaraga zo gutsinda, aho ku cyumweru yanditse amateka abona intsinzi ye ya 411 mu marushanwa ya Masters 1000, nyuma yo gutsinda Camilo Ugo Carabelli wo muri Argentine amaseti 6-1, 7-6 muri Miami Open.

Nyuma y’umukino, Djokovic yagize ati: “Niba umwanya wa mbere uza nk’ingaruka nziza y’ibikombe ntwara, ni byiza. Ariko siyo ntego yanjye. Ubu ndashaka kwitwara neza muri Grand Slam n’andi marushanwa akomeye. Igihe nashyiraga imbere gukurikirana amanota ngo mbe nimero ya mbere cyararangiye.”

Mu mateka ya Tennis, hari abakinnyi bake bamaze gutwara ibikombe byinshi kurusha Djokovic. Jimmy Connors afite ibikombe 109, mu gihe Roger Federer afite 103. Djokovic, uhamya ko gutsindira ibyo bikombe byaba ari igikorwa gikomeye, yavuze ko nubwo ari intego nziza, atazi igihe azamara mu mukino.

Djokovic yasoje agira ati: “Byaba ari igitangaza kugera kuri iyo ntego. Connors ni umuntu wanyeretse urugero rukomeye kandi unyifuriza ibyiza. Ariko ndakomeza gutera intambwe imwe ku yindi. Ndacyishimira gukina kandi igihe nzakomeza kwishimira Tennis, nzakomeza guhatana".

Uyu mugabo wagizwe umukinnyi wa mbere ku isi inshuro nyinshi kurusha abandi bose, yerekanye ko nubwo imyaka igenda yiyongera, agifite ubushobozi bwo guhangana n’abato mu mukino wa Tennis.

Novak Djokovic yagaragaje ko afifite umutima wo guhatanira ibikombe bya Tennis